Ardager jýrnalist Marat Toqashbaev Qazaqstan Konstitýtsiiasynyń preambýlasyna ózgeris engizý qajettigin aitty. Onyń pikirinshe, memleket quraýshy qazaq halqynyń mártebesi men ulttyq memlekettilik qaǵidaty negizgi zańnyń ańdatpasynda naqty kórinis tabýy tiis, dep habarlaidy Dalanews.kz.
“Biz, memleket quraýshy qazaq halqy men baiyrǵy qazaq jerin meken etken túrli ult ókilderi, birtutas Qazaqstan halqyn qurap, óz elimizde barlyq túrli ókilderiniń azamattyq quqyqtary men teńdigin tereń qorǵalatyn ulttyq memleketimizdi nyǵaita otyryp, degen sóz qosylýy tiis”, — deidi ol.
Onyń aitýynsha, mundai tolyqtyrý memleket sipatynyń ulttyq ekenin aiqyn kórsetedi.
Toqashbaev bul bastamany 1990 jylǵy 25 qazanda qabyldanǵan Memlekettik egemendik týraly deklaratsiiamen bailanystyrdy. Ol Respýblika kúni retinde atalyp ótetin bul qujat Qazaqstannyń ulttyq memlekettigin saqtaý, qorǵaý jáne nyǵaitý baǵytyn aiqyndap bergenin atap ótti.
“Bul merekeni atap ótý keiingi 2–3 jylda ǵana qaita jandandy. Demek, memleket osy qadam arqyly Memlekettik egemendik týraly deklaratsiiany umytpaǵanyn, ony este saqtap, basshylyqqa alatynyn kórsetip otyr”, - dep qosty ol.
Jýrnalist deklaratsiianyń ekinshi babynda Qazaqstan ulttyq memlekettilikti nyǵaitýǵa baǵyttalǵan sharalar qabyldaýǵa mindetti ekeni jazylǵanyn eske saldy. Sonymen qatar, bul qujat bolashaqta qabyldanatyn konstitýtsiialyq aktilerge negiz bolady degen tujyrym baryn atap ótti.
“Mine, meniń usynysym osy arnadan týyndap otyr”, - dedi ol.
Marat Toqashbaevtyń pikirinshe, usynylǵan ózgerister tarihi qujattaǵy qaǵidalardy jalǵastyryp, eldiń konstitýtsiialyq negizin nyǵaita túsýge múmkindik beredi.
