«Eir Astana» áýekompaniiasynyń prezidenti Piter Foster myrzaǵa
HAT
Osy rette «Eir Astana» áýekompaniiasy Qazaqstan Respýblikasynyń 1997 jyly 11 shildedegi №151 zańy, iaǵni Qazaqstan Respýblikasyndaǵy Til týraly zańnyń, 4-babyndaǵy «Qazaqstan Respýblikasynyń memlekettik tili» tarmaǵyna sáikes, «Qazaqstan Respýblikasynyń memlekettik tili - qazaq tili. Memlekettik til - memlekettiń búkil aýmaǵynda qoǵamdyq qatynastardyń barlyq salasynda qoldanylatyn memlekettik basqarý, zań shyǵarý, sot isin júrgizý jáne is qaǵazdaryn júrgizý tili» degen zań joldaryn óreskel buzyp otyr. Sondai-aq, áýe salasyna qatysty zań, ol – «Qazaqstan Respýblikasynyń áýe keńistigin paidalaný jáne aviatsiia qyzmeti týraly» Qazaqstan Respýblikasynyń 2010 jylǵy 15 shildedegi № 339-IV Zańy. Atalǵan Zańnyń 56 baby, 6 bóliginde kórsetilgen (sózbe-sóz) «Qazaqstan Respýblikasynyń azamattyq áýe kemesiniń kabina ekipajynyń músheleri jolaýshylarǵa qyzmet kórsetýde qazaq tilin erkin meńgerýge mindetti» degen zańnyń talaby da oryndalmaǵan. «Eir Astana» áýekompaniiasy «Tutynýshylardyń quqyǵyn qorǵaý týraly» Qazaqstan Respýblikasynyń 2010 jylǵy 4 mamyrdaǵy № 274-IV Zańynyń 24, 25, 26 baptarynda «qyzmet kórsetýshiniń tutynýshyǵa aqparattardy qazaq jáne orys tilinde jetkizý mindetti» degen zań talaptaryn tutynýshyǵa qyzmet kórsetý barysynda buzǵan. Beinerolikte jolaýshynyń memlekettik tilde qyzmet kórsetýin birneshe márte surasa da, atalmysh zańdardy kompaniia qyzmetkeriniń buzýy jalǵasa bergenin anyq kórýge bolady. Bul Qazaqstan Respýblikasynyń Konstitýtsiiasyn syilamaý dep túsinemiz.
«Eir Astana» áýekompaniiasy óziniń resmi málimdemesinde bizdiń barlyq qyzmetkerlerimiz qazaq tilin jetik biledi jáne jolaýshylarǵa memlekettik tilde qyzmet kórsetedi dep qadap aitty. Biraq biz beinerolikte kompaniia qyzmetkerinen qazaq tilin esti almadyq. Sondyqtan biz kompaniiadan kelesidei qadamdardy oryndaýdy talap etemiz:
Memlekettik tilde qyzmet ala almaǵan jolaýshydan, atalmysh jaǵdaida Oǵyz Doǵan myrzadan keshirim surasyn.
Memlekettik tilde qyzmet kórsetpegen kompaniia qyzmetkerine kompaniianyń ishki tártibine sáikes shara qoldanylsyn.
«Eir Astana» áýekompaniiasy qyzmetkerleriniń memlekettik tildi qanshalyqty meńgergendigin tekserý maqsatynda qoǵamdyq komissiia qurylsyn. Onyń erkin jáne ashyq túrde júrgizilýine múmkindik berilsin.
Oǵyz Doǵan
NAZAR AÝDARYŃYZ: «Eir Astana» áýekompaniiasy atalmysh jaǵdaiǵa qatysty birneshe málimdeme jasady. Málimdemelerde Oǵyz Doǵan myrzanyń taqtaishany der kezinde kótermegeni aitylýda. Oǵyz myrza ol aiypty tolyq moiyndap, 6800 teńge aiyppuldy tóleýge daiyn. Biraq másele qarajatta emes, másele printsipte. Egerde jolserik taqtaishaǵa qatysty eskertýdi memlekettik tilde jetkizse, sózsiz talap oryndalar edi. Sebebi Oǵyz myrza orys jáne aǵylshyn tilderin jetik bilmeidi. Atalǵan talaptar oryndalmaǵan jaǵdaida, Oǵyz Doǵan zań aiasynda óz múddesin qorǵaityn bolady.
Almaty qalasy, 16.08.2017 jyl
