Májilis depýtaty Ashat Aimaǵambetov "Mádeniet týraly" Qazaqstan Respýblikasynyń Zańyna tolyqtyrýlar engizý týraly" zań jobasyn tanystyrdy, dep habarlaidy Dalanews.kz.
Depýtattyń aitýynsha, zańda memlekettik tildiń damýyn qamtamasyz etý jáne onyń qoldanylý aiasyn keńeitý máseleleri qarastyrylǵan.
“Qazaq tilin mádeni muranyń mańyzdy bóligi retinde saqtaý kerek. Bul tildiń burmalanýyna jol bermeidi jáne onyń normalaryn bolashaq urpaqqa jetkizýge múmkindik beredi”, — deidi ol.
Onyń sózinshe, zań jobasyndaǵy ózgerister memlekettik tildi jasandy intellekt arqyly damytýǵa baǵyttalǵan.
“ChatGPT, “Alisa” siiaqty júielerdiń qazaq tilinde tiimdi jumys isteýi úshin birizdendirilgen sózdik qory, iaǵni tildik aqparattyq júie qajet. Qazirgi tsifrlyq dáýirde qazaq tiliniń de tsifrlyq sózdik qory bolýy tiis. Ony jasaý jáne barshaǵa qoljetimdi etý jasandy intellekttiń qazaqsha sapaly sóileýine múmkindik beredi. Alaida jasandy intellektti sóiletý tek sózdermen shektelmeidi, ol kúrdeli protsess. Adam ár sózdiń qoldanylǵan ornyna, dybystalǵan yrǵaǵyna jáne maǵynasyna qarai túsinip, durys mán beredi. Al jasandy intellektte túisik joq, sol sebepti ár sóz algoritm boiynsha óńdeledi”, — dep atap ótti depýtat.
Sonymen qatar ol zań jobasy qazaq tilin barlyq salada — mektepte, jumysta, qujattarda jáne tsifrlyq ortada bir júiege keltirýge baǵyttalǵanyn jetkizdi.
“Bul memlekettik organdar men qarapaiym azamattar arasyndaǵy qarym-qatynasty jeńildetedi”, — dep qosty ol.
