Búgin Ortalyq kommýnikatsiialar qyzmetindegi baspasóz konferentsiiasynda memlekettik qyzmet isteri agenttigi tóraǵasynyń orynbasary Salaýat Múksimovke qazaq tilin bilmeitin sheneýnikterdiń máselesine bailanysty suraq qoiyldy. Óz kezeginde ol qyzmetke kirisý úshin memlekettik tildi bilý deńgeiine bailanysty talaptardyń qoiylmaitynyn atap ótti, dep habarlaidy Dalanews.kz.
Kezdesý barysynda jýrnalistiń biri Energetika ministri Almasadam Sátqaliev pen Ónerkásip jáne qurylys ministri Qanat Sharlapaevtyń qazaq tilin bilmeitinin alǵa tartyp, osyǵan bailanysty olar joǵary laýazymdaǵy qyzmetterin jalǵastyra ala ma degen surai qoidy.
Múksimovtiń málimetinshe, memlekettik qyzmetke úmitkerler tapsyratyn testileý men irikteý ákimshilik memlekettik qyzmetkerlerge ǵana arnalǵan.
“Saiasi qyzmetkerler testileýden ótpeidi. Olar taǵaiyndalady. Sondyqtan bul jerde konkýrstyq irikteý ótkizilmeidi”, - dep túsindirdi ol.
Osy tusta Salaýat Múksimov til bilý týraly talap qoiý qalypty jaǵdai ekenin atap ótti.
“Tilge qatysty talaptar onyń ishinde saiasi qyzmetkerge de onyń kásibi qyzmetine qatysty qoiylýy kerek. Eger til kásibi qyzmetin oryndaý úshin mańyzdy bolsa, árine, eskerilýi kerek. Mysaly, Syrtqy ister ministrligi qyzmetkerleri, elshilikte jumys isteitinder jiberilgen eliniń tilin bilýi kerek”, - dedi ol.
Alaida Salaýat Múksimov qos ministrge qatysty naqty jaýap aitpady.
