بۇگىن ورتالىق كوممۋنيكاسيالار قىزمەتىندەگى باسپا ءسوز كونفەرەنسياسىندا مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى سالاۋات مۇكسىموۆكە قازاق ءتىلىن بىلمەيتىن شەنەۋنىكتەردىڭ ماسەلەسىنە بايلانىستى سۇراق قويىلدى. ءوز كەزەگىندە ول قىزمەتكە كىرىسۋ ءۇشىن مەملەكەتتىك ءتىلدى ءبىلۋ دەڭگەيىنە بايلانىستى تالاپتاردىڭ قويىلمايتىنىن اتاپ ءوتتى، دەپ حابارلايدى Dalanews.kz.
كەزدەسۋ بارىسىندا ءجۋرناليستىڭ ءبىرى ەنەرگەتيكا ءمينيسترى الماسادام ساتقالييەۆ پەن ونەركاسىپ جانە قۇرىلىس ءمينيسترى قانات شارلاپايەۆتىڭ قازاق ءتىلىن بىلمەيتىنىن العا تارتىپ، وسىعان بايلانىستى ولار جوعارى لاۋازىمداعى قىزمەتتەرىن جالعاستىرا الا ما دەگەن سۇراي قويدى.
مۇكسىموۆتىڭ مالىمەتىنشە، مەملەكەتتىك قىزمەتكە ۇمىتكەرلەر تاپسىراتىن تەستىلەۋ مەن ىرىكتەۋ اكىمشىلىك مەملەكەتتىك قىزمەتكەرلەرگە عانا ارنالعان.
“ساياسي قىزمەتكەرلەر تەستىلەۋدەن وتپەيدى. ولار تاعايىندالادى. سوندىقتان بۇل جەردە كونكۋرستىق ىرىكتەۋ وتكىزىلمەيدى”، - دەپ ءتۇسىندىردى ول.
وسى تۇستا سالاۋات مۇكسىموۆ ءتىل ءبىلۋ تۋرالى تالاپ قويۋ قالىپتى جاعداي ەكەنىن اتاپ ءوتتى.
“تىلگە قاتىستى تالاپتار ونىڭ ىشىندە ساياسي قىزمەتكەرگە دە ونىڭ كاسىبي قىزمەتىنە قاتىستى قويىلۋى كەرەك. ەگەر ءتىل كاسىبي قىزمەتىن ورىنداۋ ءۇشىن ماڭىزدى بولسا، ارينە، ەسكەرىلۋى كەرەك. مىسالى، سىرتقى ىستەر مينيسترلىگى قىزمەتكەرلەرى، ەلشىلىكتە جۇمىس ىستەيتىندەر جىبەرىلگەن ەلىنىڭ ءتىلىن ءبىلۋى كەرەك”، - دەدى ول.
الايدا سالاۋات مۇكسىموۆ قوس مينيسترگە قاتىستى ناقتى جاۋاپ ايتپادى.
