Astana qalasyndaǵy Nazarbaev Ziiatkerlik mektebiniń oqýshysy Fariza Fazyl bedeldi The New York Times Open Letter Contest halyqaralyq baiqaýynda álem boiynsha úzdik ondyqtyń qataryna endi. Biyl baiqaýǵa álemniń ár túkpirinen on myńǵa jýyq adam qatysyp, solardyń ishinen tek 10 qatysýshynyń ǵana haty álemge tanymal basylymda jariialaný múmkindigine ie boldy, dep habarlaidy Dalanews.kz.
Fariza óziniń ashyq hatynda qazaq qyzdarynyń esimderine bailanysty dástúrler taqyrybyn qozǵaǵan. Bul oi oǵan úlkenderdiń áńgimeleri men dostarynyń tájiribesi, sondai-aq áleýmettik jeliler men mediadaǵy pikirtalastardan keiin kelgen. Óz basynan mundai jaǵdai ótpese de, Fariza bul máseleni júrekpen qabyldap, ishki tolǵanysyn kórkem ári tereń jetkize bilgeni úshin qazylar alqasynyń nazaryn aýdardy.
"Burynǵy jeńimpazdardyń hattaryn oqyp shyqqan soń, men de ózime mańyzdy taqyrypty qaǵaz betine túsirgim keldi. Qyz balaǵa qoiylatyn esim – jai ǵana tańdaý emes, onyń ómir jolyna áser etetin dástúrdiń kórinisi ekeni oilandyrdy", – dep keltiredi Farizanyń sózin nis.edu.kz.
Baiqaý sharty boiynsha, qatysýshylar ashyq hat janrynda maqala jazýy tiis bolǵan. Bul format – naqty bir aýditoriiaǵa úndeý joldai otyryp, búkil qoǵam úshin mańyzdy taqyrypty qozǵaýǵa múmkindik beredi. Mindetti sharttardyń biri – hat tek aqparat berip qana qoimai, oqyrmandy áreket etýge nemese oilanýǵa itermeleýi kerek.
Aita keteiik, Fariza halyqaralyq deńgeidegi bilim baiqaýlarynda buǵan deiin de jetistikterge jetken. 2025 jyly Infomatrix Asia saiysynda ekinshi oryn ielense, Technovation Girls jobasynda Qazaqstan atynan jartylai finalist atanǵan.
Gýmanitarlyq baǵyttaǵy jetistikterine qaramastan, Fariza bolashaǵyn ǵylymmen bailanystyrady, naqtyraq aitqanda – biomeditsinalyq injeneriiamen.
– Maqala, esse jazǵan maǵan unaidy. Bul – shynaiy tolǵandyrǵan taqyryp týraly erkin oi aitý múmkindigi. Biraq bolashaqta men ǵylym arqyly naqty ózgeris jasaǵym keledi, – deidi Fariza.
