Qazaq pen ózbektiń dostyǵy kópke úlgi
«El Birligi» qorynyń ultaralyq qatynastar boiynsha tájiribesi mol ekenin kózi qaraqty jamaǵat biledi, bul ujymnyń kez kelgen tirliktegi kredosy – formalizmnen, kózboiaýshylyqtan alys bolý.
Sondyqtan kez kelgen jinalystarda baiandama jazbai sóileý, qatysýshylardy sózge tartý, qyzyq málimetter keltirý siiaqty áreketter jinalystyń árin keltirip turady.
Keles aýdanynyń Birtilek aýylyndaǵy jiyn mektepte ótti. Aýyldyń atynyń ózi mundaǵy halyqtyń nietiniń durystyǵy, aqtyǵyn kórsetip turǵandai. Aýyl turǵyndary jiynda sóz sóileýge tanymal sheshen Muhtar Muhambetjan men oblystyq ózbek gazetiniń basshysy Alisher Satybaldy kelgenin esitip, tegis jinaldy.
Alisher Satybaldy óz sózinde eki el basshylary N. Nazarbaev pen Sh. Mirzieevtiń kelissózderi, eki el arasyndaǵy saýda jáne rýhani qatynastar týraly aitty, sózin qazaqsha bastap, ózbekshege ótip, ózbeksheden qazaqshaǵa ótip qos jamaǵatty da óz bilimine tánti etti. Al Muhtar Muhambetjan eki eldiń dostyǵyn arttyrýdyń quraly retinde mynadai pozitsiia keltirdi:
– Qazaq pen ózbek halyqtary – baýyrlas halyqtar emes, olar bir halyq, bir ult. Jai ǵana, bir halyqtyń kóshpendi ómir saltyn ustanǵan jartysy men otyryqshy ómir saltyn ustanǵan jartysy. Qazaqtyń da, ózbektiń de súiegin qurap otyrǵan bólikter bireý ózimizdiń qońyrat-naiman, arǵyn-qypshaq, qańly, jalaiyrlar, alshyn, sirgeliler ekenin kóremiz, – dedi.
Sarapshylardyń oi-paiy elge unady. Budan keiin áziz analar shyǵyp, aqsaqaldar shyǵyp, aýylda eshqandai jikshildik joqtyǵyn, aýylda ult demei, ortaq tirlikterdi birge sheship otyrǵanyn, tipti esh jatsynbai-aq qyz alysyp qyz berisip otyrǵanyn tilge tiek etti.
Negizgi aýyldyń nazaryndaǵy másele – ultaralyq másele emes, ul-qyz tárbiesi, imandylyq siiaqty rýhani máseleler ekenin estip, shyn qýandyq. Zalǵa syimaǵan adamdar ketpei, koridorda turyp áńgime tyńdap, jinalysqa qatysty.
Nurjan YDYRYSOV
