Astana Kievpen Kaspii qubyr konsortsiýmynyń (KQK) munai aidaý stantsiiasyna jasalǵan drondar shabýylyna qatysty máseleni talqylaityn bolady. Bul týraly Syrtqy ister ministriniń birinshi orynbasary Aqan Rahmetýllin málimdedi, dep jazady Dalanews.kz.
"Biz bul jaǵdaidan habardarmyz. Qazaqstan Energetika ministrligi málimdeme jasady, soqqylar bolǵanymen, jiberilip jatqan munai kólemi burynǵy qalpynda ekeni aityldy. Árine, biz ýkrain tarapymen sóilesetin bolamyz, áńgimege tartamyz, kezdesýler bolady. Munda nemese Kievte mindetti túrde kezdesetin bolamyz. Bolashaqta mundai máselelerdi boldyrmas úshin biz bul máselelerdi diplomatiialyq jolmen sheshýimiz kerek", - dedi Rahmetýllin Informburo.kz tilshisine Májilis dálizinde bergen suqbatynda.
Aita ketsek, 2025 jyldyń 17 aqpanynda Krasnodar ólkesiniń Kavkaz aýdanynda ornalasqan Kropotkinskaia munai aidaý stansasy drondar shabýylyna ushyrady. Qaza tapqandar men zardap shekkender joq, alaida munai tasymaldaý nysany búlinip, qoldanystan shyǵyp qaldy.
"18 aqpanda oqiǵa ornynda KQK basshylyq toby jáne konsortsiýmnyń Batys óńiriniń ókilderi bolyp, territoriiany sholyp shyqty. Mamandardyń aldyna qysqa merzimde merdigerlermen birlesip, stantsiianyń barlyq qosalqy obektileriniń jumysqa qabilettiligin qalpyna keltirý úshin jóndeý jumystaryn júrgizý mindeti qoiyldy", - dep atap ótti konsortsiýmdaǵylar.
Sondai-aq "Transneft" JAQ Kaspii qubyr konsortsiýmynyń (KQK) "Kropotkinskaia" munai aidaý stantsiiasyna jasalǵan drondar shabýylynyń saldarynan qansha shyǵyn bolatynyn jariialady.
"KQK mamandarynyń pikirinshe, atalǵan soqqynyń saldarynan bolǵan aqaýlardy joiýǵa 1,5 aidan 2 aiǵa deiin ýaqyt ketedi, bul Qazaqstannyń munai aidaý kóleminiń shamamen 30%-ǵa tómendeýine ákelip soqtyrýy múmkin", - dep túsindirdi kompaniiadaǵylar.
Sondai-aq Resei Federatsiiasynyń tergeý komiteti Kaspii qubyr konsortsiýmy - azamattyq nysanyna jasalǵan shabýyl faktisi boiynsha qylmystyq is qozǵaǵany belgili boldy.
Aita keteiik, KQK Teńiz – Novorossiisk baǵyty boiynsha munai tasymaldaýdy jalǵastyrýda. Júk jóneltýshilerden munai qabyldaý sharasy munaidy aidaý boiynsha naqtylanǵan tehnikalyq múmkindikter boiynsha júzege asyrylady.
Kaspii qubyry konsortsiýmynyń Kýbannyń Kavkaz aýdanyndaǵy "Kropotkinskaia" munai aidaý stansasy RF territoriiasynda ornalasqan eń iri nysan bolyp tabylady. KQK qubyr jelileri júiesi - TMD territoriiasyndaǵy energetikalyq saladaǵy iri jobalardyń biri. Teńiz-Novorossiisk qubyrynyń uzyndyǵy 1 511 shaqyrymdy quraidy. Bul baǵyt barlyq eksportqa baǵyttalatyn munaidyń úshten ekisinen astamyn qamtidy. Munai salasynyń mamany Oljas Baidildinovtyń naqtylaýynsha, bul qubyrmen aidalatyn 63 mln tonna munaidyń 53,8 mln tonnasy – qazaqtiki, naqtyraq aitqanda, Teńiz, Qarashyǵanaq jáne Qashaǵan munaiy (búkil kólemniń 86%), sonymen qatar basqa da qazaqstandyq kompaniialardyń da shikizaty bar. Sondyqtan ol Qazaqstan da bul rette resmi ustanymyn bildirip, óz aktivin qorǵaý kerektigin aitady. Al alda da bul qubyrǵa shabýyl jasalyp, ol búlinetin bolsa, sarapshynyń aitýynsha, ondai jaǵdaida Qazaqstan munaiynyń eksporty kúrt qysqaryp, óz kezeginde ol biýdjet túsimderine, odan ári teńge baǵamyna keri áser etýi yqtimal.
KQK aktsionerleri: Resei Federatsiiasy -2 4%, "KQK kompaniiasy" MK (JShQ) – 7%, "QazMunaiGaz" UK" AQ - 19%, Kazakhstan Pipeline Ventures LLC - 1,75%, Chevron Caspian Pipeline Consortium Company - 15%, Lýkoil Interneshnl Gmbh – 12,5%, Mobil Caspian Pipeline Company – 7,5%, Rosneft-Shell Caspian Ventures Limited – 7,5%, BG Overseas Holdings Limited-2%, Eni International N. A. N. V. S. ar. l. - 2% jáne Oryx Caspian Pipeline LLC – 1,75%.
Buǵan deiin saitymyzda "Munai qubyryna jasalǵan shabýyl: Maman Ýkrainadaǵy elshini aldyrtyp, másele qozǵaýdy usynady" degen maqala jariialanǵan bolatyn.
