Pavlodar oblysy aýyldarynda meditsinalyq nysandar salýǵa 228 mln teńge bólindi, – dep habarlaidy Dalanews.kz.
Úkimet elimizge qaitarylǵan zańsyz iemdenilgen aktivter esebinen áleýmettik jobalardy júzege asyryp jatyr. Pavlodar oblysynda meditsinalyq nysandar salýǵa arnaýly memlekettik qordan 228 mln teńgeden asa qarjy bólindi.
Qarajat Ekibastuz, Aqsý qalalary aýyldyq okrýgindegi, sondai-aq, Ertis, Jelezin, Tereńkól aýdanyndaǵy jobalardy júzege asyrýǵa baǵyttalady.
"Ekibastuz aýyldyq okrýginiń Báiet aýylynda 1983 jyly paidalanýǵa berilgen jalǵyz FAP ornyna feldsherlik-akýsherlik pýnkt salý josparlanyp otyr. Eski ǵimarat jóndeýge jaramsyz dep tanyldy. Búginde eldi mekende 822 adam turady", - dep jazylǵan habarlamada.
Ertis aýdanynda dárigerlik ambýlatoriia ashylady. Nysan sanitarlyq talaptar men normalarǵa sai jabdyqtalady. Aýdandaǵy meditsinalyq pýnkt myńnan asa turǵanǵa qyzmet kórsetedi.
"Qoldanystaǵy densaýlyq saqtaý nysandary shalǵai ornalasýyna bailanysty Myńkól, Ivanovka jáne Qurkól aýyldary da jańa meditsinalyq nysandar salýdy qajet etetin eldi mekender tizimine engizilgen. Olarǵa eń jaqyn aýdandyq emhana 18 shaqyrymnan 115 shaqyrymǵa deiingi qashyqta ornalasqan. Aýyldarda turǵylyqty jeri boiynsha meditsinalyq qyzmet kórsetetin jańa meditsinalyq pýnktter salynady", - dep jazylǵan habarlamada.
Aita keteiik, Pavlodar oblysynyń eldi mekenderinde 168 myńnan asa turǵyn bar.
