ГогенÚlken shyǵarmashylyq týyndylardy tabiǵatynan óte daryndy, bilimdi, bolmysy erekshe adamdar jasaitynyn bárimiz bilemiz. Biraq... qai ǵasyrda, qai dáýirde, qai ýaqytta bolsyn, sol talantty, intellektýal, bolmysy kúrdeli shyǵarmashylyq ieleri jankeshti bolmasa, bári beker. Meniń Pol Gogenniń jankeshtiligine tańǵalmasqa sharam joq. Qoǵamy «syndyrǵysy» kelse de, synbaǵan, óz talantyna erekshe sengen, óziniń sýret ónerinde «tóńkeris» jasaitynyna sheksiz sengen oǵan degen qurmetim erekshe. Dáýletti otbasynda dúniege kelgen, eseigennen keiin birjada makler bolyp, milliondaǵan tabys taýyp, aqsúiekter ortasynda zor qurmetke ie bolǵan, bes balanyń ákesi Pol bir-aq kúnde bárinen bas tartyp, sýretshi bolǵysy keldi. Shabyt izdep, álemdi sharlap ketti. Árine, sýret ónerinde aty joq sýretshiniń kartinalaryn eshkim satyp almady. Joqshylyqtan jeńildi, dúnieni kezip kelgen kezbe sýretshini áieli úiine kirgizbedi. Balalary da teris ainaldy. «Biz nan tappai ash otyrǵanda qaida ediń? Bárin qoishy, eseigen balańnyń ólimine sen kinálisiń. Eger sen otbasy aldyndaǵy jaýapkershilikti sezingende, ashyqpaǵanda, aýyrmaǵanda, kúizelmegende ol ólmes edi» degen áieliniń kinálaýy onyń júregine qanjar bolyp qadaldy. Keshegi millioner arzan barlardy jaǵalaǵan alqashqa ainaldy. Jo-joq, ol – qoǵamy tanyǵysy kelmegen, moiyndaǵysy kelmegen uly sýretshi.
Áigili sýretshi Van Gog onyń, Pol Gogenniń álemdi moiyndatatyn sýretshi ekenin bildi. Birde Polmen sóilesip otyrǵanda qatty qyzbalanyp ketken Van Gog óz qulaǵyn kesip tastady. Búgingi kúnde nemis ónertanýshylary «Van Gog óz qulaǵyn ózi kesken joq, onyń qulaǵyn dosy Pol Gogen kesti» dep jatyr. Meniń bir bilerim: olar ekeýi de tabiǵat erekshe jaratqan daryndy edi, naǵyz talant qana naǵyz talantty moiyndaidy.
