Belsendiniń anasy Gúlbarash Jolmuhambetova Qazaqstan prezidenti Qasym-Jomart Toqaevtyń ákimshilik keńsesine áleýmettik jelide joldaǵan úndeýin jáne prezidenttiń qabyldaýyn suraǵan hatyn resmi túrde tapsyrǵanyn aitty.
- Men prezident Qasym-Jomart Toqaev balamnyń ólimine qatysty aldyn ala pikir aitý arqyly tergeýdi basqa jaqqa burdy dep sanaimyn. Bul oiymdy 31 mamyr saiasi quǵyn-súrgin qurbandary kúnine ashyq hat etip áleýmettik jelide arnaiy jariialadym. Sebebi ulym Dýlat Aǵadildi de sol saiasi qýǵynnyń qurbany dep esepteimin. Sondyqtan prezidentpen júzdeskim keledi, - dedi Jolmuhambetova.
Budan bólek Jolmuhambetova belsendiniń óler aldyndaǵy sáti beinelegen videony berýdi jáne "onyń ólimine kináli sanaityn quqyq qorǵaý organdary qyzmetkerlerin jaýap alyp, prokýratýranyń áreketsizdigine shara qoldanýdy suraǵan" aryz ótkizdi.
Ol advokaty Ǵalym Nurpeiisovpen birge Nur-Sultan qalalyq prokýratýrasy "qylmys quramy joq" sanap toqtatqan isti qaita ashýdy talap etip, prokýratýra sheshimine shaǵymdanatynyn da aitty.
Azattyq Dýlat Aǵadildiń týystarynyń aryzy týraly bas prokýratýraǵa birneshe márte habarlasqan, biraq jaýap bolmady.
Aǵadil 25 aqpanda Nur-Sultandaǵy tergeý izoliatorynda belgisiz jaǵdaida kóz jumǵan edi. IIM onyń ólimine "júrek talmasy" sebep boldy degen.
Aǵadildi 24 aqpanda túnde qarapaiym kiimdegi birneshe adamnyń úiinen kúshtep áketken. Politsiia departamenti baspasóz qyzmeti belsendini tergeý izoliatoryna áketýdi "biyl qańtar aiynda Dýlat Aǵadilge aiyp taǵylyp, "eshqaida ketpeý" týraly shara qoldanylǵan, tergeýge kelmegenine bailanysty sot sheshimimen 24 aqpanda qamaýǵa alyndy" dep túsindirgen edi.
Keiin marqum jerlengen soń, 27 aqpanda áleýmettik jelide Dýlat Aǵadildiń máiitiniń videosy taraǵan. Videony túsirgen adam onyń denesinde kógergen izder baryn aitady. Sol kezde jergilikti prokýratýra "video internetke belsendiniń týystarynyń ruqsatynsyz jariialandy, denedegi daqtar – biologiialyq ólim belgileri" dep málimdegen.
28 aqpanda Qazaqstan prezidenti Qasym-Jomart Toqaev belsendi Dýlat Aǵadil "júrek talmasynan qaitys boldy" dep málimdegen. Resmi saraptama qorytyndysy shyqpai turyp aitylǵan bul tujyrymdy qoǵam ókilderi synǵa alǵan bolatyn.
Dýlat Aǵadildiń qazasynan keiin Qazaqstannyń birneshe qalasynda narazylyq aktsiialary ótip, qatysýshylar belsendiniń qazasyna bilikti kinálap, ádil tergeýdi talap etken.
Belsendiniń qazasyna bailanysty AQSh memlekettik departamentiniń ókili, Ulybritaniianyń Qazaqstandaǵy elshiligi jáne Eýropadaǵy qaýipsizdik pen yntymaqtastyq uiymy Nur-Sultandy tergeýdi ashyq ári ádil júrgizýge shaqyrǵan. Qazaqstandyq quqyq qorǵaýshylar da Dýlat Aǵadildiń qazasyn "saiasi sipaty bar" dep sanaitynyn aitqan.
29 mamyrda belsendi Dýlat Aǵadildiń advokaty men týystary Nur-Sultandaǵy tergeý izoliatorynyń qyzmetkerlerine qatysty qylmystyq is qozǵaý týraly qalalyq prokýratýraǵa jańa shaǵym túsirdi.
Belsendiniń týystary men advokaty izoliator qyzmetkerleri Dýlat Aǵadil ózin "nashar sezinse de oǵan kóńil bólmedi" dep sanaidy.
