بەلسەندىنىڭ اناسى گۇلباراش جولمۇحامبەتوۆا قازاقستان پرەزيدەنتى قاسىم-جومارت توقايەۆتىڭ اكىمشىلىك كەڭسەسىنە الەۋمەتتىك جەلىدە جولداعان ۇندەۋىن جانە پرەزيدەنتتىڭ قابىلداۋىن سۇراعان حاتىن رەسمي تۇردە تاپسىرعانىن ايتتى.
- مەن پرەزيدەنت قاسىم-جومارت توقايەۆ بالامنىڭ ولىمىنە قاتىستى الدىن الا پىكىر ايتۋ ارقىلى تەرگەۋدى باسقا جاققا بۇردى دەپ سانايمىن. بۇل ويىمدى 31 مامىر ساياسي قۇعىن-سۇرگىن قۇرباندارى كۇنىنە اشىق حات ەتىپ الەۋمەتتىك جەلىدە ارنايى جاريالادىم. سەبەبى ۇلىم دۋلات ءاعادىلدى دە سول ساياسي قۋعىننىڭ قۇربانى دەپ ەسەپتەيمىن. سوندىقتان پرەزيدەنتپەن جۇزدەسكىم كەلەدى، - دەدى جولمۇحامبەتوۆا.
بۇدان بولەك جولمۇحامبەتوۆا بەلسەندىنىڭ ولەر الدىنداعى ءساتى بەينەلەگەن ۆيدەونى بەرۋدى جانە "ونىڭ ولىمىنە كىنالى سانايتىن قۇقىق قورعاۋ ورگاندارى قىزمەتكەرلەرىن جاۋاپ الىپ، پروكۋراتۋرانىڭ ارەكەتسىزدىگىنە شارا قولدانۋدى سۇراعان" ارىز وتكىزدى.
ول ادۆوكاتى عالىم نۇرپەيىسوۆپەن بىرگە نۇر-سۇلتان قالالىق پروكۋراتۋراسى "قىلمىس قۇرامى جوق" ساناپ توقتاتقان ءىستى قايتا اشۋدى تالاپ ەتىپ، پروكۋراتۋرا شەشىمىنە شاعىمداناتىنىن دا ايتتى.
ازاتتىق دۋلات ءاعادىلدىڭ تۋىستارىنىڭ ارىزى تۋرالى باس پروكۋراتۋراعا بىرنەشە مارتە حابارلاسقان، ءبىراق جاۋاپ بولمادى.
ءاعادىل 25 اقپاندا نۇر-سۇلتانداعى تەرگەۋ يزولياتورىندا بەلگىسىز جاعدايدا كوز جۇمعان ەدى. ءىىم ونىڭ ولىمىنە "جۇرەك تالماسى" سەبەپ بولدى دەگەن.
ءاعادىلدى 24 اقپاندا تۇندە قاراپايىم كيىمدەگى بىرنەشە ادامنىڭ ۇيىنەن كۇشتەپ اكەتكەن. پوليسيا دەپارتامەنتى باسپا ءسوز قىزمەتى بەلسەندىنى تەرگەۋ يزولياتورىنا اكەتۋدى "بيىل قاڭتار ايىندا دۋلات اعادىلگە ايىپ تاعىلىپ، "ەشقايدا كەتپەۋ" تۋرالى شارا قولدانىلعان، تەرگەۋگە كەلمەگەنىنە بايلانىستى سوت شەشىمىمەن 24 اقپاندا قاماۋعا الىندى" دەپ تۇسىندىرگەن ەدى.
كەيىن مارقۇم جەرلەنگەن سوڭ، 27 اقپاندا الەۋمەتتىك جەلىدە دۋلات ءاعادىلدىڭ ءمايىتىنىڭ ۆيدەوسى تاراعان. ۆيدەونى تۇسىرگەن ادام ونىڭ دەنەسىندە كوگەرگەن ىزدەر بارىن ايتادى. سول كەزدە جەرگىلىكتى پروكۋراتۋرا "ۆيدەو ينتەرنەتكە بەلسەندىنىڭ تۋىستارىنىڭ رۇقساتىنسىز جاريالاندى، دەنەدەگى داقتار – بيولوگيالىق ءولىم بەلگىلەرى" دەپ مالىمدەگەن.
28 اقپاندا قازاقستان پرەزيدەنتى قاسىم-جومارت توقايەۆ بەلسەندى دۋلات ءاعادىل "جۇرەك تالماسىنان قايتىس بولدى" دەپ مالىمدەگەن. رەسمي ساراپتاما قورىتىندىسى شىقپاي تۇرىپ ايتىلعان بۇل تۇجىرىمدى قوعام وكىلدەرى سىنعا العان بولاتىن.
دۋلات ءاعادىلدىڭ قازاسىنان كەيىن قازاقستاننىڭ بىرنەشە قالاسىندا نارازىلىق اكسيالارى ءوتىپ، قاتىسۋشىلار بەلسەندىنىڭ قازاسىنا بيلىكتى كىنالاپ، ءادىل تەرگەۋدى تالاپ ەتكەن.
بەلسەندىنىڭ قازاسىنا بايلانىستى اقش مەملەكەتتىك دەپارتامەنتىنىڭ وكىلى، ۇلىبريتانيانىڭ قازاقستانداعى ەلشىلىگى جانە ەۋروپاداعى قاۋىپسىزدىك پەن ىنتىماقتاستىق ۇيىمى نۇر-سۇلتاندى تەرگەۋدى اشىق ءارى ءادىل جۇرگىزۋگە شاقىرعان. قازاقستاندىق قۇقىق قورعاۋشىلار دا دۋلات ءاعادىلدىڭ قازاسىن "ساياسي سيپاتى بار" دەپ سانايتىنىن ايتقان.
29 مامىردا بەلسەندى دۋلات ءاعادىلدىڭ ادۆوكاتى مەن تۋىستارى نۇر-سۇلتانداعى تەرگەۋ يزولياتورىنىڭ قىزمەتكەرلەرىنە قاتىستى قىلمىستىق ءىس قوزعاۋ تۋرالى قالالىق پروكۋراتۋراعا جاڭا شاعىم ءتۇسىردى.
بەلسەندىنىڭ تۋىستارى مەن ادۆوكاتى يزولياتور قىزمەتكەرلەرى دۋلات ءاعادىل ءوزىن "ناشار سەزىنسە دە وعان كوڭىل بولمەدى" دەپ سانايدى.
