Qazir aýylda da, qalada da qazaq estrada juldyzdarynyń árbir basqan qadamy ańdýly, aitqan sózi qyzý pikir talasqa sebep bolyp turǵany belgili. Qysqasy juldyzdarǵa qarap boi túzeitin deńgeige jettik. Budan ánshiler qoǵam aldynda úlken jaýapkershilikti moinyna alǵanyn baiqaimyz. Ókinishke orai, mundai jaýapkershilik júgin kei ánshi sezinse, endi biri múlde sezinbeidi. Qazir jurttyń nazarynda júrgen ánshilerdiń biri – Qairat Nurtas. Jas seri ataq-abyroidan kende emes. Ánshige degen halyqtyń yqylasy da erekshe. Ásirese aýyldaǵy jastar Qairat dese ishken astaryn jerge qoiady. Qairatqa aitar syn az. Tek onyń anasy, prodesseri Gúlzira Aidarbekovaǵa aitar nazymyz bar.
Estrada juldyzdary tek ónerimen halyqqa úlgi-ónege kórsetse, qaneki. Biraq sońǵy kezderi olar ne kiip, ne ishetinderin áleýmettik jeliler arqyly jarnamalap, jastardyń júregin aýyrtyp júrgenderin ózderi de bilmeidi. Taiaýda Qairattyń anasy Gúlzira hanym «31 arnadan» efirge shyǵatyn «Juldyzdy shańyraq» dep atalatyn baǵdarlamadan ulynyń qandai kiim kietinin, onyń baǵasy qansha turatynyn kópshilikke jaiyp salǵanda, talyp túse jazdadyq. Qairattyń anasy ulynyń bir syrt kiimi úshin 13-15 myń dollar jumsaitynyn maqtanyshpen aitty. Bizdi qoiyńyzshy, bul birinshi kezekte Qairatqa eliktep, sol siiaqty kiinetin jastarǵa aýyr soqqy bolyp tigeni anyq (ózderine de sol kerek). Mundai qymbat kiimge qol jetkizýge ekiniń biriniń shamasy jetpeidi. Sondyqtan Gúlzira hanymnyń ulynyń garderoby jaiynda jelpinip áńgime aitýy orynsyz-aq boldy. Qairat halyqty óziniń jyltyraq kiimderimen emes, oinaqy, lirikalyq ánderimen baýrap alatynyn esten shyǵarǵandai. Al muny anasynyń eskermeýi úlken aǵattyq boldy.
Taiaýda Qairattyń anasy Gúlzira hanym «31 arnadan» efirge shyǵatyn «Juldyzdy shańyraq» dep atalatyn baǵdarlamadan ulynyń qandai kiim kietinin, onyń baǵasy qansha turatynyn kópshilikke jaiyp salǵanda, talyp túse jazdadyq. Qairattyń anasy ulynyń bir syrt kiimi úshin 13-15 myń dollar jumsaitynyn maqtanyshpen aitty.
Budan keiin Gúlzira Úsenqyzy óziniń neshe túrli asyl tastarmen kómkerilgen kiim-keshekterin júrgizýshi qyzǵa kórsetip, áýre bolyp ketti. Baǵdarlama júrgizýshisi qymbat kiim kórmegen qyz ba dep qaldyq. Qairattyń anasy jyltyraǵan árbir kóilegin kórsetkende tańqalyp, ishegin tartyp, tańyrqaýmen boldy. Baǵdarlama bastalyp úige kirgen bette jańa úidi qashan alǵanyn, qalai sándegeni jaiynda bastyrmalatyp suraq qoiǵanda bul habar juldyzdardyń úi-jaiyn qalai jabdyqtaitynyn kórsetetin habar ma dep oilap qaldyq. Biraq, sóz tórkini kiim-keshekke aýysqanda bul juldyzdardyń basqan-turǵan qadamyn ańdityn kóp habardyń biri ekenin uqtyq. Beker obaly ǵana Gúlzira hanym materialdyq qundylyqty airyqsha baǵalaityn júrgizýshini qaqpaqailap, sórede jinaýly turǵan kitaptary men ulyna ánsúier qaýymnyń syiǵa tartqan qobyzy men qoldan salǵan sýretterin kórsetip, bir áńgimeniń shetin shyǵarmaq bolǵanda, júrgizýshimiz óziniń jattandy suraqtaryn qoiyp, qyzyqty áńgimeni úzip jibergende, telearnany basqa arnaǵy aýystyryp jibergimiz keldi. Biraq habardyń ekinshi bóliminde Qairatpen suhbat bolatynyn baǵdarlama barysynda jyltyńdatyp jarnamalaǵannan keiin, amalsyz shydaýǵa týra keldi. Gúlzira hanymnyń Almatydaǵy úiinde qandai kiim-keshegi, jihazy, áshekei buiymdary bar ekenin bilgennen keiin, kezek Qairatqa keldi.
Júrgizýshi qyz ǵalamtordy sharlap júrgen ósekterdiń negizinde daiyndaǵan suraqtaryn shetinen syzdyqtatyp qoia bastady. «Qaida demalasyz?», «tamaq istei alasyz ba?» («isteseńiz qandai tamaq isteisiz?»), «juldyz bolýdy armandadyńyz ba?» degen suraqtardy qoiǵanda júrgizýshi Qairat Nurtastyń sońǵy kezdegi ómiri jaiynda múlde beihabar ma dep qaldyq. Óz basym júrgizýshi «Praim plazadaǵy» oqiǵadan keiin nendei oi túidiń?», «Sol alasapyranda qolǵa túsip, isti bolǵan óziń quryptas jastardyń taǵdyryna alańdaisyń ba?» degen jurttyń kókeiinde júrgen saýaldardy qoiatyn shyǵar dep úmittengen edim. Onymyz beker boldy. Sol baiaǵy kódi-sódi áńgime. «Apama jezdem sai» demekshi, budan keiin Qairakeńde «ashylyp» áńgime aitqan boldy. Túrkiiaǵa demalýǵa barǵanda ushaqta túrik jigitiniń aiaǵyna qalai qosqanyn aityp bergende júrgizýshi máz bolyp, kúlkiden jaryla jazdady. Qulaqqa kiretin áńgime bolmaitynyn bilgen soń, ornymyzdan turyp kettik.
Jarbol KENTULY.
