قايراتقا ايتار سىن از. تەك ونىڭ اناسى، پرودەسسەرى گۇلزيرا ايداربەكوۆاعا ايتار نازىمىز بار.[/caption]
ءقازىر اۋىلدا دا، قالادا دا قازاق ەسترادا جۇلدىزدارىنىڭ ءاربىر باسقان قادامى اڭدۋلى، ايتقان ءسوزى قىزۋ پىكىر تالاسقا سەبەپ بولىپ تۇرعانى بەلگىلى. قىسقاسى جۇلدىزدارعا قاراپ بوي تۇزەيتىن دەڭگەيگە جەتتىك. بۇدان انشىلەر قوعام الدىندا ۇلكەن جاۋاپكەرشىلىكتى موينىنا العانىن بايقايمىز. وكىنىشكە وراي، مۇنداي جاۋاپكەرشىلىك جۇگىن كەي ءانشى سەزىنسە، ەندى ءبىرى مۇلدە سەزىنبەيدى. ءقازىر جۇرتتىڭ نازارىندا جۇرگەن انشىلەردىڭ ءبىرى – قايرات نۇرتاس. جاس سەرى اتاق-ابىرويدان كەندە ەمەس. انشىگە دەگەن حالىقتىڭ ىقىلاسى دا ەرەكشە. اسىرەسە اۋىلداعى جاستار قايرات دەسە ىشكەن استارىن جەرگە قويادى. قايراتقا ايتار سىن از. تەك ونىڭ اناسى، پرودەسسەرى گۇلزيرا ايداربەكوۆاعا ايتار نازىمىز بار.
ەسترادا جۇلدىزدارى تەك ونەرىمەن حالىققا ۇلگى-ونەگە كورسەتسە، قانەكي. ءبىراق سوڭعى كەزدەرى ولار نە كيىپ، نە ىشەتىندەرىن الەۋمەتتىك جەلىلەر ارقىلى جارنامالاپ، جاستاردىڭ جۇرەگىن اۋىرتىپ جۇرگەندەرىن وزدەرى دە بىلمەيدى. تاياۋدا قايراتتىڭ اناسى گۇلزيرا حانىم «31 ارنادان» ەفيرگە شىعاتىن «جۇلدىزدى شاڭىراق» دەپ اتالاتىن باعدارلامادان ۇلىنىڭ قانداي كيىم كيەتىنىن، ونىڭ باعاسى قانشا تۇراتىنىن كوپشىلىككە جايىپ سالعاندا، تالىپ تۇسە جازدادىق. قايراتتىڭ اناسى ۇلىنىڭ ءبىر سىرت كيىمى ءۇشىن 13-15 مىڭ دوللار جۇمسايتىنىن ماقتانىشپەن ايتتى. ءبىزدى قويىڭىزشى، بۇل ءبىرىنشى كەزەكتە قايراتقا ەلىكتەپ، سول سياقتى كيىنەتىن جاستارعا اۋىر سوققى بولىپ تيگەنى انىق (وزدەرىنە دە سول كەرەك). مۇنداي قىمبات كيىمگە قول جەتكىزۋگە ەكىنىڭ ءبىرىنىڭ شاماسى جەتپەيدى. سوندىقتان گۇلزيرا حانىمنىڭ ۇلىنىڭ گاردەروبى جايىندا جەلپىنىپ اڭگىمە ايتۋى ورىنسىز-اق بولدى. قايرات حالىقتى ءوزىنىڭ جىلتىراق كيىمدەرىمەن ەمەس، ويناقى، ليريكالىق اندەرىمەن باۋراپ الاتىنىن ەستەن شىعارعانداي. ال مۇنى اناسىنىڭ ەسكەرمەۋى ۇلكەن اعاتتىق بولدى.
تاياۋدا قايراتتىڭ اناسى گۇلزيرا حانىم «31 ارنادان» ەفيرگە شىعاتىن «جۇلدىزدى شاڭىراق» دەپ اتالاتىن باعدارلامادان ۇلىنىڭ قانداي كيىم كيەتىنىن، ونىڭ باعاسى قانشا تۇراتىنىن كوپشىلىككە جايىپ سالعاندا، تالىپ تۇسە جازدادىق. قايراتتىڭ اناسى ۇلىنىڭ ءبىر سىرت كيىمى ءۇشىن 13-15 مىڭ دوللار جۇمسايتىنىن ماقتانىشپەن ايتتى.
بۇدان كەيىن گۇلزيرا ۇسەن قىزى ءوزىنىڭ نەشە ءتۇرلى اسىل تاستارمەن كومكەرىلگەن كيىم-كەشەكتەرىن جۇرگىزۋشى قىزعا كورسەتىپ، اۋرە بولىپ كەتتى. باعدارلاما جۇرگىزۋشىسى قىمبات كيىم كورمەگەن قىز با دەپ قالدىق. قايراتتىڭ اناسى جىلتىراعان ءاربىر كويلەگىن كورسەتكەندە تاڭقالىپ، ىشەگىن تارتىپ، تاڭىرقاۋمەن بولدى. باعدارلاما باستالىپ ۇيگە كىرگەن بەتتە جاڭا ءۇيدى قاشان العانىن، قالاي ساندەگەنى جايىندا باستىرمالاتىپ سۇراق قويعاندا بۇل حابار جۇلدىزداردىڭ ءۇي-جايىن قالاي جابدىقتايتىنىن كورسەتەتىن حابار ما دەپ ويلاپ قالدىق. ءبىراق، ءسوز توركىنى كيىم-كەشەككە اۋىسقاندا بۇل جۇلدىزداردىڭ باسقان-تۇرعان قادامىن اڭديتىن كوپ حاباردىڭ ءبىرى ەكەنىن ۇقتىق. بەكەر وبالى عانا گۇلزيرا حانىم ماتەريالدىق قۇندىلىقتى ايرىقشا باعالايتىن جۇرگىزۋشىنى قاقپاقايلاپ، سورەدە جيناۋلى تۇرعان كىتاپتارى مەن ۇلىنا انسۇيەر قاۋىمنىڭ سىيعا تارتقان قوبىزى مەن قولدان سالعان سۋرەتتەرىن كورسەتىپ، ءبىر اڭگىمەنىڭ شەتىن شىعارماق بولعاندا، جۇرگىزۋشىمىز ءوزىنىڭ جاتتاندى سۇراقتارىن قويىپ، قىزىقتى اڭگىمەنى ءۇزىپ جىبەرگەندە، تەلەارنانى باسقا ارناعى اۋىستىرىپ جىبەرگىمىز كەلدى. ءبىراق حاباردىڭ ەكىنشى بولىمىندە قايراتپەن سۇحبات بولاتىنىن باعدارلاما بارىسىندا جىلتىڭداتىپ جارنامالاعاننان كەيىن، امالسىز شىداۋعا تۋرا كەلدى. گۇلزيرا حانىمنىڭ الماتىداعى ۇيىندە قانداي كيىم-كەشەگى، جيھازى، اشەكەي بۇيىمدارى بار ەكەنىن بىلگەننەن كەيىن، كەزەك قايراتقا كەلدى.
جۇرگىزۋشى قىز عالامتوردى شارلاپ جۇرگەن وسەكتەردىڭ نەگىزىندە دايىنداعان سۇراقتارىن شەتىنەن سىزدىقتاتىپ قويا باستادى. «قايدا دەمالاسىز؟»، «تاماق ىستەي الاسىز با؟» («ىستەسەڭىز قانداي تاماق ىستەيسىز؟»)، «جۇلدىز بولۋدى ارماندادىڭىز با؟» دەگەن سۇراقتاردى قويعاندا جۇرگىزۋشى قايرات نۇرتاستىڭ سوڭعى كەزدەگى ءومىرى جايىندا مۇلدە بەيحابار ما دەپ قالدىق. ءوز باسىم جۇرگىزۋشى «پرايم پلازاداعى» وقيعادان كەيىن نەندەي وي ءتۇيدىڭ؟»، «سول الاساپىراندا قولعا ءتۇسىپ، ءىستى بولعان ءوزىڭ قۇرىپتاس جاستاردىڭ تاعدىرىنا الاڭدايسىڭ با؟» دەگەن جۇرتتىڭ كوكەيىندە جۇرگەن ساۋالداردى قوياتىن شىعار دەپ ۇمىتتەنگەن ەدىم. ونىمىز بەكەر بولدى. سول باياعى كودي-سودي اڭگىمە. «اپاما جەزدەم ساي» دەمەكشى، بۇدان كەيىن قايراكەڭدە «اشىلىپ» اڭگىمە ايتقان بولدى. تۇركياعا دەمالۋعا بارعاندا ۇشاقتا تۇرىك جىگىتىنىڭ اياعىنا قالاي قوسقانىن ايتىپ بەرگەندە جۇرگىزۋشى ءماز بولىپ، كۇلكىدەن جارىلا جازدادى. قۇلاققا كىرەتىن اڭگىمە بولمايتىنىن بىلگەن سوڭ، ورنىمىزدان تۇرىپ كەتتىك.
جاربول كەنت ۇلى.
