Áńgime barysynda Qairat taǵdyryn ózgertken jol apaty jaiyn sóz etti. Ánshi sot aldyndaǵy bar jaýapkershiliginen qutylǵanyn málimdedi.
«Osynyń bári basyma túskende abdyrap qaldym, ne isterimdi bilmedim. Ol azdai, jýrnalister men aram niettiler tarapynan qysym boldy. Dál osy sebepti esh jerden kórinbedim, eshkimmen aralaspadym. El oilaǵandai zań aldyndaǵy jaýapkershilikten nemese jol apatynda japa shekkenderden qashqannan emes. Bar bolǵany eshkimdi kórgim kelmedi, sebebi kóńil qoshym, kúshim bolǵan joq»
– degen Qairat jol apatyndaǵy qarsy taraptyń óz abyroiyna nuqsan keltirgenin atap ótti.
Ánshi basyna is túskende jalǵyz qalǵanyn, dostarynyń teris ainalǵanyn tilge tiek etti. Ol bir kezderi elden ketip qalýdy qalaǵanyn da aitty. Alaida ýaqyt óte kele bul oiynan bas tartqan. Onyń aiaqqa turýyna týǵandary men súiiktisi kómektesken. Odan bólek, sport zal, boks pen fýtboldyń da oń yqpaly tigen.
Qairat endi shyǵarmashylyǵyna bilek sybana kirispek. Ol uzaq ýaqyttan keiin “Ushqan baǵym” atty ánine beinebaian túsirip, el nazaryna usynbaq.
“Bul beinebaian meniń jańa ómirge, shyǵarmashylyqqa qaita oralýym. Men úshin jańa stil, jańa tynys. Klipte ózimdi akter retinde barynsha kórsetýge tyrystym. Men onda án aitpaimyn, tek oinaimyn. 6 minýtqa sozylatyn týyndyda ózimniń jańa ánimniń fonynda shizofreniktiń rólin somdamaimyn”
– deidi ánshi.
Qairattyń alǵa qoiǵan josparlary kóp. Kúsh-qýat jinap alǵan ánshi aldymen gastróldik saparmen Qazaqstandy aralamaq. Al odan keiin muhittyń arǵy jaǵyna, dálirek aitsaq Amerikaǵa baryp jumys isteýdi kózdep otyr. Ánshi materialdyq jaǵdaiyn túzetý úshin toiǵa shyqpaitynyn aitty.
“Men ózime jáne mýzykama satqyndyq jasamaimyn. Árine, toida án aityp milliondar tabýyma bolar edi. Biraq men alańdar jinaǵym keledi. Qazirgi basty kózdegenim – Amerika, sony baǵyndyrsam deimin, qalǵanyn ýaqyt kórseter. Biraq eshqandai jaǵdaida Qazaqstannan ketpeimin, tek biraz ýaqyt Amerikada jumys istemekpin”, – deidi Qairat.
