Májilis depýtaty Ermurat Bapi Bas prokýrorǵa Qairat Satybaldyulynyń "Hilton" qonaqúiine qatysty rekettik qylmystary týraly aitty, - dep habarlaidy Dalanews.kz.
Depýtattyń sózinshe, byltyr jeltoqsan-qańtar ailarynda Qairat Satybaldy taǵy da 150 mlrd teńgeniń aktivin memleketke qaitardy degen ashyq aqparat bolǵan. Osy somanyń 4 milliardtan astam teńgesi Qairat Satybaldynyń jeke kásipkerden tartyp alǵan aktivi.
"Bul soma eks-premer "memleketke 1 trln teńge aktiv qaitaryldy" degen eseptiń ishine de kirip ketken. Anyǵynda, Qairat Satybaldy "memleketke qaitardym" degen aktivtiń bir bóligi – "Hilton-Almaty" qonaq úiin qiturqy qysastyq jasaý jolymen "Abli-Qurylys" Jaýapkershiligi shekteýli seriktestiginiń menshik iesi Sholpan Qaraneevadan tartyp alǵan", - deidi depýtat.
Bapidiń sózinshe, eks-prezidenttiń nemere inisi 50-ge jýyq saqaldy nókerlerimen kelip, "Hilton" qonaq úiin basyp alǵan kezdiń videosy menshik iesinde saqtalǵan.
"Osy rekettik-qylmystyq áreketti tekserý barysynda qajet deseńiz, ol videony Qaraneeva hanymnan suratyp alýǵa bolady.
Ótinish berýshi sotqa shaǵymdansa da, búginde Satybaldy túrmede jatsa da, áli kúnge deiin "kúshtiniń arty diirmen tartýda". Bul qysastyq qylmysqa qarsy buǵan deiin depýtat Maqsat Tolyqbai arasha túsý áreketin jasasa da, jábir kórýshi jaq janushyra jan-jaqqa shaǵymdanyp júrse de, «Hiltonnyń» hikaiasy Satybaldynyń paidasyna sheshilip tur", - deidi Ermurat Bapi.
