Almatyda «Qairat» pen «Realdyń» tarihi matchy aiaqtaldy. Almatylyq klýb qaqpasyna jaýapsyz bes gol soǵyldy, dep habarlaidy Dalanews.kz.
Oiyn Chempiondar ligasynyń jalpy kezeńiniń ekinshi týry aiasynda ótti. Alǵashqy minýttardan bastap alańǵa qos komandanyń basty juldyzdary – Kilian Mbappe, Vinisiýs Jýnior, Dastan Sátpaev jáne Sherhan Qalmyrza shyqty. Alǵashqy taimnyń sońyna qarai esep «Realdyń» paidasyna 0:1 boldy.
Birinshi taimdaǵy jalǵyz goldy frantsýz shabýylshysy Kilian Mbappe soqty. Ol 25-minýtta 11 metrlik aiyp dobyn sátti júzege asyrdy.
Ekinshi taimda Mbappe taǵy eki márte kózge tústi – 52 jáne 74 minýttarda soqqan goldarymen esepti 3:0-ge jetkizdi.
Frantsýz forvardynyń eki golynyń arasynda tóreshi «Real» qaqpasyna penalti belgiledi, biraq beinetaspaǵa júgingennen keiin sheshimin ózgertip, aiyp dobyn joqqa shyǵardy.
«Qairattyń» bapkeri Rafael Ýrazbahtin oiyn barysyn ózgertýge tyrysyp, alańǵa Baibekti, Edmilsondy, Stanoevti, Rikardinony jáne jaraqatynan keiin uzaq ýaqyt oinamaǵan Zariiany shyǵardy. Degenmen bul kezdesýdiń taǵdyryn ózgerte almady.
83-minýtta Edýardo Kamavinga «Qairat» qaqpasyna tórtinshi goldy soqty. Bul da sońǵy gol bolmady.
Qosymsha ýaqytta Braim Dias besinshi goldy soǵyp, matchtaǵy sońǵy núkteni qoidy.
Kezdesý «Realdyń» paidasyna 5:0 esebimen aiaqtaldy.
Eske sala keteiik, madridtik «Real» tarihynda alǵash ret Qazaqstan aýmaǵynda resmi oiyn ótkizdi. Al almatylyqtar úshin Eýropanyń eń titýldy klýbymen ótken bul kezdesý Chempiondar ligasynyń jalpy kezeńindegi alǵashqy óz alańyndaǵy match boldy.
Buǵan deiin sport sarapshylary Dalanews.kz-ke bergen suqbatynda “Qairat” pen “Real Madrid” matchyna boljam jasady.
