Jekemenshikke tiesili «Qairat» fýtbol klýbyna 2026 jyly Almaty qalasynyń biýdjetinen 840 mln teńge bólinedi. Bul týraly qalalyq biýdjettiń egjei-tegjeili shyǵystaryna silteme jasaǵan Besmedia jazdy, dep habarlaidy Dalanews.kz.
Bólinetin qarajattyń negizgi bóligi - 750 mln teńge -klýbtyń qyzmetin qamtamasyz etýge baǵyttalmaq. Onyń ishinde Premer-ligadaǵy negizgi komanda, jastar quramy jáne fýtbol akademiiasynyń jumysy qamtylady.
Qazirgi tańda «Qairat» klýbynyń qurylymynda 103 qyzmetker bar. Olardyń qatarynda negizgi quram men «Qairat Jastar» komandasynyń fýtbolshylary men bapkerleri, sondai-aq akademiiada jumys isteitin 41 jattyqtyrýshy bar. Akademiiada búginde 800-den astam bala bilim alady.
Budan bólek, Almatyda fýtzaldy damytýǵa 90 mln teńge qarastyrylǵan. Bul qarjy jattyǵý úderisine, jarystarǵa qatysýǵa jáne bolashaq sportshylar rezervin daiarlaýǵa jumsalmaq.
Sonymen qatar «Qairat» klýby 2025–2026 jylǵy maýsymda óz tarihynda alǵash ret ÝEFA Chempiondar ligasynyń jalpy kezeńine shyqty. Bul jetistik klýbqa shamamen 20,2 mln eýro, iaǵni 12 mlrd teńgege jýyq tabysqa kepildik berip otyr.
Onyń ishinde 18,5 mln eýro klýbqa týrnirge qatysqany úshin ǵana tólengen.
