Qairat Boranbaevtyń kompaniiasyna tiesili bolǵan jer telimin aýktsion arqyly satý múmkin bolmady, dep habarlaidy Dalanews.kz.
Elektrondy saýda alańynyń derekterine súiensek, atalǵan jer ýchaskesine qatysty aýktsion 13 tamyz kúni ótken. Alaida aýktsion bastalǵan sátte birde-bir qatysýshy tirkelmegen, sol sebepti saýda ótkizilmei qaldy.
Buryn Almaly holdingine tiesili bolǵan bul jer telimi Shien aýylynyń mańynda ornalasqan. Jalpy kólemi 3323 gektardy quraidy. Bastapqy satý baǵasy – 243 million teńge.
Tek bir jer telimi ǵana satyldy
Sol kúni, iaǵni 13 tamyzda, memleket menshigine qaitarylǵan aktivterdi basqaratyn kompaniianyń balansynda turǵan taǵy toǵyz jer telimi boiynsha da aýktsiondar josparlanǵan. Alaida solardyń ishinde tek bir jer telimi satyldy.
Atap aitqanda, Shamalǵan aýylynda ornalasqan, jalpy kólemi 4546 gektar bolatyn jer telimi 217 million teńgege satyldy. Bul lot boiynsha bir ǵana qatysýshy saýdaǵa qatysýǵa niet bildirgen. Atalǵan jerdiń buǵan deiin kimge tiesili bolǵany belgisiz.
Aita keteiik, buǵan deiin Almaty oblysynda tárkilengen 10 jer telimi aýktsionǵa qoiylǵany týraly jazǵan edik. Bul týraly Qaitarylǵan aktivterdi basqarý kompaniiasy habarlady.
Eń arzan lottyń bastapqy baǵasy 11,2 mln teńgeni, al eń qymbaty - 474,7 mln teńgeni quraidy. Barlyq lottardyń jiyntyq bastapqy quny 1,5 mlrd teńgege jetedi.
Aýktsionǵa qoiylǵan jer telimderiniń biri - aýmaǵy 3323 gektar bolatyn ýchaske - buryn Qairat Boranbaev quryltaishysy bolǵan Almaly holdingine tiesili bolǵan. Ol Shien aýylynyń mańynda ornalasqan. Bul ýchaskeniń bastapqy baǵasy - 243 mln teńge.
Aýktsionǵa qatysý úshin:
E-Qazyna platformasynda tirkelý;
Kepildik jarna engizý;
Ótinishti belgilengen merzimde tapsyrý qajet.
