«QazMunaiGaz» ulttyq kompaniiasynda sońǵy bes jylda óndiristik jaraqattaný 34%-ǵa, jol-kólik oqiǵalarynyń sany 73%-ǵa tómendedi, dep habarlaidy dalanews.kz.
«QazMunaiGaz» Ulttyq kompaniiasy úshin qyzmetkerlerdiń qaýipsizdigi basty qundylyq bolyp tabylady. Sońǵy bes jylda júrgizilgen júieli jumystardyń nátijesinde óndiristik jaraqattaný 34 paiyzǵa, jol-kólik oqiǵalarynyń sany 73 paiyzǵa tómendedi. 2023 jyldan bastap órt oqiǵalary tirkelgen joq», - dedi «QazMunaiGaz» UK AQ basqarma tóraǵasynyń birinshi orynbasary Qurmanǵazy Esqaziev Úkimet otyrysynda.
Onyń aitýynsha, kompaniia 2018 jyldan beri Munai jáne gaz óndirýshileriniń halyqaralyq qaýymdastyǵynyń (IOGP) múshesi bolyp tabylady jáne 2025 jyldyń qorytyndysy boiynsha óndiristik qaýipsizdik kórsetkishteri halyqaralyq talaptarǵa sáikes kelgen.
Kompaniia málimetinshe, jazataiym oqiǵalardyń shamamen úshten biri qaýiptiligi joǵary jumystarǵa jáne uńǵymalardy kúrdeli ári jerasty jóndeý kezinde júrgiziletin kóterip-túsirý operatsiialaryna tiesili.
«Osy baǵytta jaraqattanýdy tómendetý maqsatynda 2025 jyly 60 brigadada QazMunaiGazdyń menshikti ázirlemesi – “TUMAR” kompiýterlik kórý júiesi engizildi», - dedi Esqaziev.
Onyń sózinshe, jasandy intellekt negizinde jumys isteitin júie naqty ýaqyt rejiminde jeke qorǵanys quraldarynyń bolmaýyn, qyzmetkerlerdiń qaýipti aimaqtarda júrýin jáne qaýipsizdik talaptarynyń saqtalmaýyn anyqtaidy.
Qazir atalǵan tehnologiia 60 brigadada qoldanylyp jatyr. Kompaniia 2027 jyldyń sońyna deiin júiemen 242 brigadany qamtyp, 100 paiyzdyq kórsetkishke qol jetkizýdi josparlap otyr. Sonymen qatar uqsas Computer Vision júiesi úsh munai óńdeý zaýytynda engizilýde.
Ónerkásiptik qaýipsizdik baǵytynda munai óndirý kóleminiń shamamen 90%-yn qamtamasyz etetin 12 iri ken ornynda tsifrlyq egizderdi engizý jumystary bastalǵan.
«Aǵymdaǵy jyldyń qazan aiynda Shyǵys Moldabek ken ornynda tsifrlyq egiz tolyq kólemde engiziledi. Osyndai jumystardy 12 ken ornynda kezeń-kezeńimen 2028 jyldyń sońyna deiin aiaqtaý josparlanýda», - dedi Esqaziev.
Onyń aitýynsha, munai tasymaldaý jáne munai óńdeý salalarynda táýekelderdi boljaý men boljamdy taldaý jobalary iske qosylǵan. Bul júieler qaýipti aqaýlardy erte anyqtaýǵa, apattar sanyn azaitýǵa jáne óndiristik shyǵyndardy tómendetýge múmkindik beredi.
Qaýipsiz eńbek mádenietin qalyptastyrý maqsatynda ótken jyly óndiristik qaýipsizdik boiynsha 52,8 myń qyzmetkerdi qamtyǵan 80 myńnan astam oqytý ótkizilgen. Onyń ishinde eńbekti qorǵaý, ónerkásiptik qaýipsizdik jáne órt-tehnikalyq minimým boiynsha mindetti baǵdarlamalar bar.
2026-2028 jyldary bul maqsatqa shamamen 2,6 mlrd teńge bólý josparlanǵan. Sonymen qatar kompaniia halyqaralyq IOSH jáne NEBOSH baǵdarlamalary boiynsha basshylardy oqytýǵa jáne oqytýdy basqarýdyń LMS júiesin engizýge basymdyq berip otyr.
«QazMunaiGaz qaýipsizdikti basqarýdyń tsifrlyq modelin qurýǵa kezeń-kezeńimen kóshýde. Bizdiń strategiialyq maqsatymyz – óndiristegi jaraqattaný deńgeiin nólge jetkizý», - dep túiindedi Qurmanǵazy Esqaziev.
