Aýyl sharýashylyǵy ministrligi iri-qara mal sanyna qatysty statistikany rettedi. Vedomstvo buǵan deiingi jasalǵan esep-qisapta qate baryn aitqan edi. Jańarǵan málimetterge súiensek, elde mal sany shamamen 2 millionǵa qysqarǵan bolyp shyqty.
Qate statistika Qazaqstandaǵy aýyl sharýashylyǵyn damytýǵa óte úlken zardap tigizetinin sheneýnikter aitqan edi. Mal basynyń sany sharýashylyq esep arqyly jasalady. Ony aýyldar men aýyl okrýgteri ákimderi daiyndaidy.
«Derekterden qate ketse, onda naryqta ónim tapshy, memleket tarapynan qoldaý jetkiliksiz bolyp másele týyndaýy múmkin. Odan basqa da zardaptary bolady. Endi mal sharýashylyǵyna qatysty statistikany Aýyl sharýashylyǵy ministrligi rettep, sáikestendirdi. Derekter durys bolsa, josparlaǵanda da, ishki naryqty rettegende de jóndi sheshim shyǵarýǵa múmkindik týady» deidi Aýyl sharýashylyǵy ministrliginiń baspasóz-qyzmeti.
Statistika durystalǵan soń jańa derekter jariialandy. Atap aitqanda, 2024 jyldyń 1 qańtaryndaǵy ahýalǵa sáikes, elde iri-qara mal basy 2 millionǵa jýyq azaiǵan. Sút óndirisi — 2 million tonnaǵa, qoi sany — 14 %, eshki — 20 %, shoshqa — 34%, úi qusy — 22%, et óndirisi — 15%, taýyq jumyrtqasy óndirisi 10 paiyzǵa qysqarǵan.
Endi sheneýnikter dál osyndai jumysty ósimdik salasynda da júrgizý kerek dep otyr. Bul salaǵa qatysty jańa derekter biylǵy tamyzǵa qarai daiyn bolyp qalýǵa tiis. Eske sala ketsek, byltyr iri-qara mal sany — 8,4 mln, qoi — 19 mln, jylqy — 3,8 mln, eshki — 2,3 mln, shoshqa — 700 myń, túie — 250 myń, úi qusy 49,5 mln bolǵan.
