اۋىل شارۋاشىلىعى مينيسترلىگى ءىرى-قارا مال سانىنا قاتىستى ستاتيستيكانى رەتتەدى. ۆەدومستۆو بۇعان دەيىنگى جاسالعان ەسەپ-قيساپتا قاتە بارىن ايتقان ەدى. جاڭارعان مالىمەتتەرگە سۇيەنسەك، ەلدە مال سانى شامامەن 2 ميلليونعا قىسقارعان بولىپ شىقتى.

قاتە ستاتيستيكا قازاقستانداعى اۋىل شارۋاشىلىعىن دامىتۋعا وتە ۇلكەن زارداپ تيگىزەتىنىن شەنەۋنىكتەر ايتقان ەدى. مال باسىنىڭ سانى شارۋاشىلىق ەسەپ ارقىلى جاسالادى. ونى اۋىلدار مەن اۋىل وكرۋگتەرى اكىمدەرى دايىندايدى.

«دەرەكتەردەن قاتە كەتسە، وندا نارىقتا ءونىم تاپشى، مەملەكەت تاراپىنان قولداۋ جەتكىلىكسىز بولىپ ماسەلە تۋىنداۋى مۇمكىن. ودان باسقا دا زارداپتارى بولادى. ەندى مال شارۋاشىلىعىنا قاتىستى ستاتيستيكانى اۋىل شارۋاشىلىعى مينيسترلىگى رەتتەپ، سايكەستەندىردى. دەرەكتەر دۇرىس بولسا، جوسپارلاعاندا دا، ىشكى نارىقتى رەتتەگەندە دە ءجوندى شەشىم شىعارۋعا مۇمكىندىك تۋادى» دەيدى اۋىل شارۋاشىلىعى مينيسترلىگىنىڭ باسپاسوز-قىزمەتى.   

ستاتيستيكا دۇرىستالعان سوڭ جاڭا دەرەكتەر جاريالاندى. اتاپ ايتقاندا، 2024 جىلدىڭ 1 قاڭتارىنداعى احۋالعا سايكەس، ەلدە ءىرى-قارا مال باسى 2 ميلليونعا جۋىق ازايعان. ءسۇت ءوندىرىسى — 2 ميلليون تونناعا، قوي سانى — 14 %، ەشكى — 20 %، شوشقا — 34%، ءۇي قۇسى — 22%، ەت ءوندىرىسى — 15%، تاۋىق جۇمىرتقاسى ءوندىرىسى 10 پايىزعا قىسقارعان.

ەندى شەنەۋنىكتەر ءدال وسىنداي جۇمىستى وسىمدىك سالاسىندا دا جۇرگىزۋ كەرەك دەپ وتىر. بۇل سالاعا قاتىستى جاڭا دەرەكتەر بيىلعى تامىزعا قاراي دايىن بولىپ قالۋعا ءتيىس. ەسكە سالا كەتسەك، بىلتىر ءىرى-قارا مال سانى — 8،4 ملن، قوي — 19 ملن، جىلقى — 3،8 ملن، ەشكى — 2،3 ملن، شوشقا — 700 مىڭ، تۇيە — 250 مىڭ، ءۇي قۇسى 49،5 ملن بولعان.