Almatyda ótken baspasóz máslihatynda Hasan Qasymbaevtyń qorǵaýshylary istegi zańbuzýshylyqtardy atap ótip, ony qoǵamdyq rezonansqa bailanysty qýdalap jatqanyn málimdedi, dep habarlaidy Dalanews.kz Kursiv.kz-ke silteme jasap.
Advokat Gúlmira Babajanovanyń sózinshe, alǵashqy sot otyrysy ashyq ótken, BAQ ókilderi qatysqan. Biraq keiin jýrnalisterdi basqa zalǵa aýystyryp, protseske tolyqqandy qatysý múmkindiginen aiyrǵan.
"Bul – sot talqylaýynyń jariialylyǵyn óreskel buzý", - dedi ol.
Qoǵamdyq qorǵaýshy Qýat Aýǵanbek istiń tek aiyptaý baǵytymen júrip jatqanyn aitady. Onyń sózinshe, Qasymbaevty uiymdasqan qylmystyq top jetekshisi dep aiyptaityndai naqty dálel joq.
"Bar bolǵany rezonansqa súienip, esh dálelsiz adam taǵdyryn sheship otyr. Hasan Qasymbaev jalǵan aqparat pen qoǵamdyq qysymnyń qurbany bolyp otyr", - dedi ol.
Advokat Erlan Mendeshev Qasymbaevqa qatysty qylmystyq istiń 2021 jyly dálel bolmaýyna bailanysty toqtatylǵanyn, keiin Sherzat isinen týǵan rezonansqa bailanysty qaita qozǵalǵanyn aitty.
"Isti muraǵattan shyǵarardai eshqandai jańa mán-jai bolǵan joq", - deidi ol.
Mendeshevtiń aitýynsha, sotqa deiingi tergeýde zańbuzýshylyqtar tirkelgen. Jábirlenýshi tarap tergeý derekterin jariialamaý týraly qolhat bergenine qaramastan BAQ-qa suqbat bergen. Sonymen birge advokat Qasymbaev pen ózge kúdiktilerge qysym jasalǵanyn, arnaiy jasaq qyzmetkerleri jaýap alý kezinde azaptaýǵa barǵanyn málimdedi.
Qorǵaýshylar jábirlenýshi Arman Álimovtyń kórý qabiletin joǵaltýy kásibi sporttaǵy soqqylardyń saldary bolýy múmkin ekenin alǵa tartty. Advokat Babajanova bul derekterdi iske tirkeýdi suraǵanymen, sot qabyldamaǵan. Al Qýat Aýǵanbek jábirlenýshige qatysty qoǵamda jalǵan obraz qalyptasqanyn, onyń turmystyq zorlyq pen esirtkige qatysty ister boiynsha qylmystyq jaýapkershilikke tartylǵanyn jetkizdi.
Aita keteiik, Talǵarda Hasan Qasymbaevqa qatysty sot protsesi júrip jatyr. Ol adam urlaý, qasaqana aýyr dene jaraqatyn keltirý jáne bopsalaý baptary boiynsha aiyptalýda.
