Burynǵy ádilet mınıstri Marat Beketaevty kúzetpen ustaý merzimi taǵy uzardy. Bul týraly Astana soty ókilderi málimdedi, - dep habarlaıdy Dalanews.kz.

Astana soty baspasóz qyzmeti málimetinshe, qalanyń mamandandyrylǵan aýdanaralyq tergeý soty kúdikti Marat Beketaevqa qatysty kúzetpen ustaý túrindegi bultartpaý sharasyn 2024 jylǵy 21 aqpanǵa deıin uzartqan.

Eks-sheneýnikti byltyr qazanda Sybaılas jemqorlyqqa qarsy qyzmet ustaǵan edi. Al jeltoqsanda ony kúzetpen ustaý merzimi 21 qańtarǵa deıin uzardy. Bul joly taǵy da uzaryp otyr.

Buǵan deıin bas prokýrordyń orynbasary Áset Shyndalıev Marat Beketaev Qazaqstannan qashpaq bolǵan sátinde ustalǵanyn aıtqan edi. Al Antıkordyń málimetinshe, Beketaev úlestes kompanıalardyń múddesin qorǵaǵan.