Qarlyǵash Jamanqulova «Ádil sóz» sóz bostandyǵyn qorǵaý halyqaralyq qorynyń prezidenti qyzmetinen ketedi, dep habarlaidy dalanews.kz.
«Ádil sóz» sóz bostandyǵyn qorǵaý halyqaralyq qory qor prezidenti Qarlyǵash Jamanqulovanyń ókilettigi aiaqtalǵanyn habarlady. Ol basshylyq etken úsh jarym jylda qor qyzmetiniń aýqymy men mazmuny edáýir keńeidi: jýrnalisterge tikelei quqyqtyq kómek kórsetýmen qatar, zańnamany jetildirýge baǵyttalǵan júieli jumys ta jolǵa qoiyldy.
Quqyqtyq qorǵaý
2022 jylǵy jeltoqsannan beri qor óńirlik jáne respýblikalyq BAQ ókilderine, blogerler men jýrnalisterge 1 989 zańgerlik keńes berdi, 49 sot protsesinde media qyzmetkerleriniń múddesin qorǵady, 25 resmi málimdeme men ashyq úndeý jáne 16 quqyqtyq sholý jariialady.
Zańnamany jetildirý
Osy kezeńde qor BAQ, aqparatqa qol jetkizý, media men jýrnalisterdiń múddesine qatysty zań jobalary boiynsha qurylǵan jumys toptaryna júieli túrde qatysty. Bul qordyń qabyldanyp qoiǵan sheshimderge ún qatýmen ǵana shektelmei, negizgi qujattardyń mazmunyna ázirleý kezeńinde yqpal etýine múmkindik berdi.
«Mass-media týraly» zańdy ázirleý barysynda qatań shekteýlerdi kózdeitin normalardyń engizilýine jol berilmedi. Atap aitqanda, «erekshe jaǵdailar» kezinde quqyq qorǵaý organdaryna BAQ-qa qatysty shamadan tys ókilettik berý jáne materialdardy jariialamas buryn laýazymdy tulǵalarmen kelisý talaptary alynyp tastaldy. Jala jabýǵa qatysty talap qoiý merzimi bir jyl bolyp belgilendi; BAQ saýaldaryna jaýap berý merzimi 7 jumys kúninen 5 jumys kúnine qysqartyldy; jýrnalistiń qosymsha qorǵaý sharalaryn qamtityn erekshe quqyqtyq mártebesi bekitildi.
Qor akkreditteý salasyndaǵy shekteýshi normalarǵa júieli túrde qarsy turdy: Mádeniet ministrligi buiryǵynyń jobasyna balama usynystar ázirledi, jýrnalistiń akkreditteýden bas tartý týraly sheshimge shaǵymdaný quqyǵyn qujatqa engizýge jáne akkreditteýdi turaqty ári ýaqytsha túrlerge bólýge qol jetkizdi.
Qor sondai-aq Mádeniet jáne aqparat ministrliginiń 12 buiryq jobasyna usynystar joldady, sheteldik BAQ-ty akkreditteý sharttaryna qatysty QR Syrtqy ister ministrligine usynys engizdi, jýrnalister qaýipsizdigin qamtamasyz etý jónindegi ulttyq strategiianyń tujyrymdamasyn usyndy. Buǵan qosa, QR Qylmystyq kodeksiniń 274-babyn shekten tys keń túsindirýge jol bermeý úshin normativtik qaýly qabyldaý týraly usynyspen Joǵarǵy sotqa júginý bastamasyn kóterdi.
Kásibi damý jáne jańa standarttar
Osy kezeńde qor Qazaqstanda álemdik tájiribede keńinen moiyndalǵan sheshim jýrnalistikasy janryn alǵash ret júieli túrde engizdi. Oqytýǵa jetekshi sheteldik sarapshylar tartylyp, 150-den astam qazaqstandyq jýrnalist osy janr boiynsha kásibi daiarlyqtan ótti. Budan bólek, qor el boiynsha 53 vebinar, 15 sheberlik sabaǵyn, 28 seminar men trening ótkizip, 30 oqytý beinematerialyn jariialady.
«Biz úshin zań buzýshylyqtardy tirkeýmen ǵana shektelmei, quqyqtyq kómekti taldamalyq jáne zańnamalyq jumystarmen ushtastyrý mańyzdy boldy. Osy jyldar boiǵy adal ári nátijeli birlesken jumys úshin komandaǵa, óńirlik tilshilerge, halyqaralyq seriktesterge jáne Qazaqstannyń búkil jýrnalister qaýymyna alǵys aitamyn», – dep túiindedi Qarlyǵash Jamanqulova.
