Ákim aldymen Saýran aýdanyndaǵy Qosmezgil eldi mekenindegi 300 oryndyq mekteptiń jai-kúiimen tanysty. Atalǵan bilim uiasy 2022 jyly tapsyrylǵan. Konkýrstyq quny – 1 mlrd. 180 mln teńge.
Biraq bul mektep áli oqýshylardy qabyldai almai otyr. Sebebi, abattandyrý jáne sýmen qamtý jumystary aiaqtalmaǵan.
Osy máselege toqtalǵan oblys ákimi qurylys basqarmasynyń basshysy men aýdan ákimine kemshilikti mamyr aiynyń sońyna deiin joiýdy tapsyrdy.
– Mekteptiń qurylysyna az qarjy jumsalmaǵan. Ádemi mektep salýǵa tolyq jetedi. Biraq merdigerdiń jumysy qadaǵalanbaǵan.
Abattandyrý jumysyn atqarý kerek. Sýmen qamtý júiesin, oiyn alańshalaryn, stadionyn retke keltirińizder. Jattyǵý qural-jabdyqtary men sport alańy balalar úshin qaýipsiz bolýy qajet.
Qurylys basqarmasy, aýdan ákimdigi, Bilim basqarmasy osy máselelerdi birlese atqaryp, mekteptiń jumysyn bastańyzdar, – dedi Darhan Satybaldy.
Óńir basshysy odan keiin Saýran aýdandyq emhanasyn aralap, jumysymen tanysty. Densaýlyq saqtaý salasynyń ókilderimen kezdesip, osy saladaǵy máselelerdi talqylady. Aldaǵy josparlar saralandy. Talqylaý nátijesinde aýdanǵa 500 adamdy qabyldaityn zamanaýi emhana qajet ekeni anyqtaldy. Oblys ákimi bul máseleni sheshýge qoldaý kórsetiletinin jetkizdi. Densaýlyq saqtaý basqarmasy men aýdan ákimdigine osy joba boiynsha usynys berý tapsyryldy.
