Qarashada berilgen nesieniń jalpy somasy 18% ósip, 1,6 trln teńgege deiin jetti. Árine, ósim mólsheri onsha emes, degenmen bir ai buryn bul kórsetkish, tipti 6%-ǵa azaiǵan edi. Bul rette dinamikadaǵy negizgi tizginge kepilsiz tutynýshylyq nesieler ie. Atalǵan segmentte berilgen nesielerdiń kólemi 998 mlrd teńgeni quraidy, dep jazady Dalanews.kz.
"Ipotekalyq nesieniń jai-kúii báz-baiaǵysha, óte jaqsy. Qazan aiymen salystyrǵanda nesie berý kólemi 11% ósip, 245 mlrd teńgege jetti. Degenmen, rásimdelgen nesie sany qatty óse qoimaǵan - 5% nemese 13,6 myń birlikke deiin. Al ipotekalyq qaryz portfeli 1 jeltoqsanda 6,5 trln teńgeni qurady. Qoldanystaǵy kelisimshart 620 myń birlik bolsa, ony 592 myń adam rásimdegen", dep jazady Birinshi kredittik biýro óz Telegram arnasynda.
Avtonesie berý kólemi eki ai qatarynan joǵary deńgeide tur. Sonymen qatar bul nátije aldyńǵy aimen salystyrǵanda 5%-ǵa kóbeigen. Máselen, bir ai buryn 185 mlrd teńgege avtonesie alynsa, qarashada bul kórsetkish 194 mlrd teńgeni qurady. Alaida bir aida berilgen nesie sany ózgerissiz qalyp otyr: 23,6 myń.
PDL-segmentinde azdap jandaný baiqalady. Qazan aiyna qaraǵanda berilgen nesieler kólemi 8%, iaǵni 40 mlrd teńgege deiin, al olardyń sany 5%,iaǵni 603 myń birlikke deiin artqan. Alaida, bul da jaǵdaidy túzei almaýda, óitkeni qazirgi kórsetkish áli de jyl basyndaǵy deńgeiden áldeqaida tómen.
Biznesti nesielendirýge kelsek, jalpy berilgen nesie kólemi bir aida 8,3%-ǵa ósti. Qazirgi deńgeii – 1,8 trln teńge. Munda da eskeretin mynandai jait bar: bul segmentte bir ai buryn 10%-dyq tómendeý tirkelgen. Bul oraida jeke kásipkerlikke berilgen nesie kólemi zańdy tulǵalarmen salystyrǵanda eki ese joǵary qarqynmen ósken: 16%.
Degenmen, bul jerde salystyrýǵa kelmeitin absoliýttik kórsetkishter týraly sóz bolyp tur. Naqtyraq aitqanda, jeke kásipkerler kórsetkishi 160 mlrd teńge, al zańdy tulǵalar kórsetkishi 1,66 trln teńgeni qurady.
"Qarashada 47,8 myń kelisimshart jasalǵan. Bul qazanǵa qaraǵanda 2% kóp. Bul oraida, ósim tek jeke kásipkerlik segmentinde baiqalady (+2%, 34,9 myń birlikke deiin). Al zańdy tulǵalar segmentinde ózgeris joq (12,9 myń birlik)", delingen usynylǵan aqparatta.
Buǵan deiin jyl basynan beri qarasha aiynda dollar satyp alýshylardyń eń joǵary tirkelgenin jazǵanbyz. Al qarasha aiynyń basynda 1 AQSh dollarynyń baǵamy 488 teńgeni, al aidyń aiaǵynda 511,22 teńgeni qurady.
