قاراشادا بەرىلگەن نەسيەنىڭ جالپى سوماسى 18% ءوسىپ، 1،6 ترلن تەڭگەگە دەيىن جەتتى. ارينە، ءوسىم مولشەرى ونشا ەمەس، دەگەنمەن ءبىر اي بۇرىن بۇل كورسەتكىش، ءتىپتى 6%-عا ازايعان ەدى. بۇل رەتتە ديناميكاداعى نەگىزگى تىزگىنگە كەپىلسىز تۇتىنۋشىلىق نەسيەلەر يە. اتالعان سەگمەنتتە بەرىلگەن نەسيەلەردىڭ كولەمى 998 ملرد تەڭگەنى قۇرايدى، دەپ جازادى Dalanews.kz.
"يپوتەكالىق نەسيەنىڭ جاي-كۇيى ءباز-باياعىشا، وتە جاقسى. قازان ايىمەن سالىستىرعاندا نەسيە بەرۋ كولەمى 11% ءوسىپ، 245 ملرد تەڭگەگە جەتتى. دەگەنمەن، راسىمدەلگەن نەسيە سانى قاتتى وسە قويماعان - 5% نەمەسە 13،6 مىڭ بىرلىككە دەيىن. ال يپوتەكالىق قارىز پورتفەلى 1 جەلتوقساندا 6،5 ترلن تەڭگەنى قۇرادى. قولدانىستاعى كەلىسىمشارت 620 مىڭ بىرلىك بولسا، ونى 592 مىڭ ادام راسىمدەگەن"، دەپ جازادى ءبىرىنشى كرەديتتىك بيۋرو ءوز Telegram ارناسىندا.
اۆتونەسيە بەرۋ كولەمى ەكى اي قاتارىنان جوعارى دەڭگەيدە تۇر. سونىمەن قاتار بۇل ناتيجە الدىڭعى ايمەن سالىستىرعاندا 5%-عا كوبەيگەن. ماسەلەن، ءبىر اي بۇرىن 185 ملرد تەڭگەگە اۆتونەسيە الىنسا، قاراشادا بۇل كورسەتكىش 194 ملرد تەڭگەنى قۇرادى. الايدا ءبىر ايدا بەرىلگەن نەسيە سانى وزگەرىسسىز قالىپ وتىر: 23،6 مىڭ.
PDL-سەگمەنتىندە ازداپ جاندانۋ بايقالادى. قازان ايىنا قاراعاندا بەرىلگەن نەسيەلەر كولەمى 8%، ياعني 40 ملرد تەڭگەگە دەيىن، ال ولاردىڭ سانى 5%،ياعني 603 مىڭ بىرلىككە دەيىن ارتقان. الايدا، بۇل دا جاعدايدى تۇزەي الماۋدا، ويتكەنى قازىرگى كورسەتكىش ءالى دە جىل باسىنداعى دەڭگەيدەن الدەقايدا تومەن.
بيزنەستى نەسيەلەندىرۋگە كەلسەك، جالپى بەرىلگەن نەسيە كولەمى ءبىر ايدا 8،3%-عا ءوستى. قازىرگى دەڭگەيى – 1،8 ترلن تەڭگە. مۇندا دا ەسكەرەتىن مىنانداي جايت بار: بۇل سەگمەنتتە ءبىر اي بۇرىن 10%-دىق تومەندەۋ تىركەلگەن. بۇل ورايدا جەكە كاسىپكەرلىككە بەرىلگەن نەسيە كولەمى زاڭدى تۇلعالارمەن سالىستىرعاندا ەكى ەسە جوعارى قارقىنمەن وسكەن: 16%.
دەگەنمەن، بۇل جەردە سالىستىرۋعا كەلمەيتىن ابسوليۋتتىك كورسەتكىشتەر تۋرالى ءسوز بولىپ تۇر. ناقتىراق ايتقاندا، جەكە كاسىپكەرلەر كورسەتكىشى 160 ملرد تەڭگە، ال زاڭدى تۇلعالار كورسەتكىشى 1،66 ترلن تەڭگەنى قۇرادى.
"قاراشادا 47،8 مىڭ كەلىسىمشارت جاسالعان. بۇل قازانعا قاراعاندا 2% كوپ. بۇل ورايدا، ءوسىم تەك جەكە كاسىپكەرلىك سەگمەنتىندە بايقالادى (+2%، 34،9 مىڭ بىرلىككە دەيىن). ال زاڭدى تۇلعالار سەگمەنتىندە وزگەرىس جوق (12،9 مىڭ بىرلىك)"، دەلىنگەن ۇسىنىلعان اقپاراتتا.
بۇعان دەيىن جىل باسىنان بەرى قاراشا ايىندا دوللار ساتىپ الۋشىلاردىڭ ەڭ جوعارى تىركەلگەنىن جازعانبىز. ال قاراشا ايىنىڭ باسىندا 1 اقش دوللارىنىڭ باعامى 488 تەڭگەنى، ال ايدىڭ اياعىندا 511،22 تەڭگەنى قۇرادى.
