Belgili ǵalym, tehnika ǵylymdarynyń doktory, professor Edige Zakarin qaitys boldy. Qaraly habardy Ionosfera institýtynyń ujymy jetkizdi, dep habarlaidy dalanews.kz.
Institýt ákimshiliginiń málimetinshe, Edige Asqaruly Zakarin 2 maýsym kúni 87 jasqa qaraǵan shaǵynda uzaqqa sozylǵan syrqattan keiin dúnieden ótken.
"Institýt qyzmetkeri, tehnika ǵylymdarynyń doktory, professor Zakarin Edige Asqarulynyń ómirden ozǵanyn tereń qaiǵymen habarlaimyz. Ol – ál-Farabi atyndaǵy Qazaqstan Respýblikasynyń ǵylym jáne tehnika salasyndaǵy Memlekettik syilyǵynyń laýreaty, QR UǴA Ǵaryshtyq zertteýler institýtynyń negizin qalaýshylardyń biri. Onyń kópjyldyq ǵylymi jáne pedagogikalyq qyzmeti otandyq ǵylymnyń damýyna zor úles qosty", – delingen institýt habarlamasynda.
Edige Zakarin Qazaqstandaǵy ǵaryshtyq zertteýler, geoinformatika jáne Jerdi qashyqtyqtan zondtaý salalarynyń damýyna airyqsha úles qosqan ǵalymdardyń biri boldy. Onyń jetekshiligimen geoinformatika jáne Jerdi qashyqtyqtan zondtaý baǵytynda ǵylymi mektep qalyptasty.
Sondai-aq ǵalym elimizde geoaqparattyq modeldeý siiaqty jańa ǵylymi baǵyttyń ornyǵýyna jáne damýyna eleýli eńbek sińirdi.
Edige Asqarulymen qoshtasý rásimi 2026 jylǵy 4 maýsym kúni saǵat 10:00-de Almaty qalasy, Qalqaman yqsham aýdany, 4a k2 mekenjaiynda, №1 qalalyq klinikalyq aýrýhananyń qarsy betinde ótedi.
