Qaraǵandy oblysynyń 15 myń stýdenti «Jastar – Zań men tártiptiń tiregi» forýmyna qatysty. Olarǵa esirtki saýdasynan, internet-alaiaqtyqtan jáne dropperlikten aqsha tappaq bolǵan óz qurdastarynyń qylmystyq jaýapkershilikke tartylǵan naqty oqiǵalary kórsetildi. Sońǵy bes jylda Qazaqstanda osyndai qylmystar jasaǵany úshin 21 jasqa tolmaǵan 800 adam sottalǵan, dep habarlaidy dalanews.kz.
Forýmnyń basty taqyryptarynyń biri – qabyldaǵan sheshimderi úshin jaýapkershilik. Sonymen qatar stýdentterge quqyqtyq saýattylyqty arttyrý, esirtki qylmystarynyń, alaiaqtyq pen kiberqylmystyń aldyn alý máseleleri túsindirildi.
Qaraǵandy oblysynyń ákimi Ermaǵanbet Bólekpaev jastardyń quqyqtyq sanasyn qalyptastyrýdyń mańyzdylyǵyna toqtaldy.
– Búginde jastardyń kózqarasy men minez-qulqynyń qalyptasýyna tsifrlyq orta, ásirese áleýmettik jeliler barǵan saiyn kóbirek yqpal etip keledi. Buǵan jasóspirimder airyqsha beiim: tez aqsha tabýǵa degen umtylys keide olardy óreskel qatelikterge, tipti qylmysqa deiin jeteleidi. Sondyqtan Memleket basshysy atap ótkendei, bizdiń mindetimiz – jas urpaqpen jaýapkershilik, adaldyq jáne zańdy qurmetteý týraly olar túsinetin tilde ári zamanaýi formatta sóilesý, – dedi Ermaǵanbet Bólekpaev.
Qylmystyń internet keńistigine barǵan saiyn belsendi túrde aýysýy týraly oblys prokýrory Murat Tileýberdiev te aitty. Onyń sózinshe, quqyq qorǵaý organdaryna mundai qylmystarmen kúresýdiń jańa tásilderin meńgerip, jumys ádisterin jetildirýge týra keledi. Al jas mamandar bul iske tyń ideialar men jańa kózqaras ákele alady.
– Qylmystyq orta ǵylymi-tehnikalyq progrestiń jetistikterin óz maqsatyna paidalanyp otyr. Alaiaqtyq jasaý, esirtki satý siiaqty qylmystar internet keńistigine aýysty. Quqyq qorǵaý organdary óz jumysyn qaita qarap, qylmystardy ashýdyń jańa ádisterin ázirlep jatyr. Bul rette tyń kózqaras pen jańashyl tásildiń mańyzy orasan. Shyǵarmashylyq oilaý, zerektik, jańa sheshimder taba bilý – jastarǵa tán qasietter. Sondyqtan sizderge artylar úmit zor, – dedi Murat Tileýberdiev.
Sonymen birge forýmda tek tyiym men jaza týraly ǵana sóz bolǵan joq. Stýdentterge jastardyń túrli daǵdylaryn damytýǵa, jumys izdeýge jáne óz bastamalaryn júzege asyrýǵa kómektesetin NextUrpaq, Jas Fund jáne «Ózińnen basta» jobalary tanystyryldy.
– Mundai forýmdar qajet, óitkeni olar jastar men bilik ókilderi arasynda tikelei dialog ornatýǵa múmkindik beredi. Biz úshin bir-birimizdi tyńdaý ǵana emes, jastardyń pikiri shyn máninde mańyzdy ekenin túsiný de qajet. Biz – elimizdiń bolashaǵyn qalyptastyratyn kelesi urpaqpyz. Sondyqtan jaýapty sheshim qabyldaýdy búginnen bastap úirenýimiz kerek. Jastarmen zań, tártip jáne jaýapkershilik týraly sóilesý asa mańyzdy. Zań biz ony ózimiz qurmettep, saqtaǵan kezde ǵana tolyqqandy jumys isteidi, – deidi Qaraǵandy meditsina ýniversitetiniń stýdenti Shapaǵat Qurmanǵazyqyzy.
Forým aiasynda Qaraǵandy ulttyq ýniversitetiniń zań fakýltetinde bolashaq prokýror aýditoriiasy ashyldy.
Munda «Prokýrorlyq qadaǵalaý» páni boiynsha sabaqtar prokýratýranyń qazirgi qyzmetkerleriniń qatysýymen ótedi.
Forým ashyq ári interaktivti formatta uiymdastyryldy. Stýdentter túrli oiyndarǵa, ashyq pikirtalastar men paneldik kezdesýlerge qatysyp, sarapshylarǵa suraq qoidy, naqty jaǵdailardy talqylap, óz sheshimderin usyndy.
Forým barysynda qoǵamdyq ómirge belsendi aralasqany, azamattyq ustanymy, zań men tártip qaǵidattaryn qurmettegeni úshin birqatar jasqa oblys ákimi men prokýrorynyń alǵys hattary tabystaldy.
Sondai-aq balalaryn laiyqty tárbielep, eldiń jaýapty azamattaryn qalyptastyrýǵa úles qosqan ata-analarǵa da alǵys bildirildi.
Is-shara «Zań jáne tártip» tujyrymdamasyn ilgeriletý aiasynda ótkizildi. Forým jastardyń quqyqtyq mádenietin arttyrýǵa, quqyq buzýshylyqtardyń aldyn alýǵa jáne qabyldaityn sheshimderine jaýapkershilikpen qaraý daǵdysyn qalyptastyrýǵa baǵyttaldy.
