Qaraǵandy oblysynda biylǵy egin jinaý naýqany barysynda shamamen 1 mln gektar astyqty jinaý josparlanyp otyr, dep habarlaidy dalanews.kz.
Óńirde egin jinaý jumystaryna shamamen 2 myń kombain jáne 9 myńnan astam aýyl sharýashylyǵy tehnikasy daiyndalýda. Qazirgi ýaqytta tehnikanyń daiyndyq jumystary aiaqtalýǵa jaqyn.
Aýyl sharýashylyǵy tehnikasynyń egistikke jappai shyǵýy qyrkúiek aiynyń basynda kútiledi.
Biylǵy astyq alqaptarynyń negizgi bóligin, shamamen 760 myń gektardy, bidai quraidy. Budan bólek, sharýalar arpa, suly jáne maily daqyldardy jinaidy.
Sondai-aq 16 myń gektardan kartop, 2 myń gektardan kókónis jinaý josparlanǵan.
Kúrdeli aýa raiy jaǵdaiyna qaramastan, egistiktiń basym bóligi jaqsy jáne qanaǵattanarlyq jaǵdaida. Aýyl sharýashylyǵy óndirýshileriniń negizgi mindeti – egin jinaý jumystaryn belgilengen merzimde aiaqtaý.
Jumystardy júrgizý úshin óńirge 19,3 myń tonna jeńildetilgen dizel otyny bólindi.
Jinalǵan ónimdi saqtaý úshin oblysta jalpy syiymdylyǵy 1,438 mln tonna bolatyn astyq qoimalary bar. Kartop pen kókónisterdi saqtaýǵa arnalǵan 143 qoimanyń jalpy syiymdylyǵy 350 myń tonnadan asady.
Sonymen qatar «Keń dala» jáne «Keń dala 2» baǵdarlamalary aiasynda Agrarlyq kredittik korporatsiia arqyly 265 sharýashylyq qarjylandyryldy. Budan bólek, 315 aýyl sharýashylyǵy taýaryn óndirýshi «QazAgroQarjy» AQ-nyń qarjylai qoldaýymen 705 tehnika satyp alǵan.
