Қарағанды облысында биылғы егін жинау науқаны барысында шамамен 1 млн гектар астықты жинау жоспарланып отыр, деп хабарлайды dalanews.kz.
Өңірде егін жинау жұмыстарына шамамен 2 мың комбайн және 9 мыңнан астам ауыл шаруашылығы техникасы дайындалуда. Қазіргі уақытта техниканың дайындық жұмыстары аяқталуға жақын.
Ауыл шаруашылығы техникасының егістікке жаппай шығуы қыркүйек айының басында күтіледі.
Биылғы астық алқаптарының негізгі бөлігін, шамамен 760 мың гектарды, бидай құрайды. Бұдан бөлек, шаруалар арпа, сұлы және майлы дақылдарды жинайды.
Сондай-ақ 16 мың гектардан картоп, 2 мың гектардан көкөніс жинау жоспарланған.
Күрделі ауа райы жағдайына қарамастан, егістіктің басым бөлігі жақсы және қанағаттанарлық жағдайда. Ауыл шаруашылығы өндірушілерінің негізгі міндеті – егін жинау жұмыстарын белгіленген мерзімде аяқтау.
Жұмыстарды жүргізу үшін өңірге 19,3 мың тонна жеңілдетілген дизель отыны бөлінді.
Жиналған өнімді сақтау үшін облыста жалпы сыйымдылығы 1,438 млн тонна болатын астық қоймалары бар. Картоп пен көкөністерді сақтауға арналған 143 қойманың жалпы сыйымдылығы 350 мың тоннадан асады.
Сонымен қатар «Кең дала» және «Кең дала 2» бағдарламалары аясында Аграрлық кредиттік корпорация арқылы 265 шаруашылық қаржыландырылды. Бұдан бөлек, 315 ауыл шаруашылығы тауарын өндіруші «ҚазАгроҚаржы» АҚ-ның қаржылай қолдауымен 705 техника сатып алған.
