Qaraǵandy oblysyndaǵy Kostenko atyndaǵy shahtada bolǵan jarylys saldarynan 46 adam qaza tapqan atyshýly oqiǵa boiynsha ótip jatqan sot protsesinde jábirlenýshi tarap aiyptalýshylardan moraldyq shyǵyn óndirip berýdi surady, dep habarlaidy Dalanews.kz.
Sot qaýlysynda: “Atalǵan qylmystyq is boiynsha aiyptalýshylardy azamattyq jaýapker retinde taný” týraly jazylǵan.
Birqatar jábirlenýshi moraldyq ziiandy óndirý týraly azamattyq talap-aryzdar túsirgen. Talap etilgen soma ondaǵan million teńgeni quraidy. Sot bul azamattardy azamattyq talapker dep tanydy.
Sonymen qatar moraldyq ótemaqy óndirýdi suraǵan jábirlenýshilerdiń biri aiyptalýshylardyń múlkine arest qoiýdy surady. Alaida sot bul talapty qanaǵattandyrmady. Sebebi talapker sot sheshimin májbúrlep oryndatýǵa kedergi kelýi múmkin naqty dálelder keltirmegen.
Is boiynsha sotqa shahta ákimshiligi men injenerlik-tehnikalyq qyzmetkerler qatarynan 10 adam tartylǵan. Olardyń barlyǵyna QR QK 277-babynyń 3-bóligi (“Taý-ken jumystaryn júrgizý kezinde qaýipsizdik erejelerin buzý, abaisyzda birneshe adamnyń ólimine alyp kelý”) boiynsha aiyp taǵylyp otyr. Bul bap 3 jyldan 8 jylǵa deiin bas bostandyǵynan aiyrýdy qarastyrady.
Aiyptalýshylar tergeý izoliatorynda. Sot protsesi Qaraǵandy qalasyndaǵy Álihan Bókeihan aýdanynyń №61 túzetý mekemesinde ótip jatyr. Isti aýdandyq sot sýdiasy Bahtiiar Akanov qarap jatyr.
Is boiynsha 74 adam jábirlenýshi dep tanylǵan. Qaza tapqan shahterlerdiń týystary buǵan deiin tek shahta basshylyǵyn ǵana emes, búkil kompaniiany – burynǵy “ArselorMittal Temirtaý” AQ-ny da jaýapqa tartýdy talap etken bolatyn.
Eske sala keteiik, bul qylmystyq is 2024 jyly 18 aqpanda sotqa joldandy. Aiyptalýshylardyń advokattary qylmystyq qýdalaýdy toqtatyp, bultartpaý sharasyn ózgertý týraly ótinish bildirgen.
Tergeý málimetinshe, qaiǵyly jaǵdaiǵa sebep bolǵan – taý-ken jumystaryn júrgizý kezinde qaýipsizdik erejeleriniń óreskel buzylýy. Resmi derek boiynsha, kómir shańynyń shekti normadan birneshe ese artyq kontsentratsiiasy jarylysqa sebep bolǵan.
Aita keteiik, 2023 jyly 28 qazanǵa qaraǵan túni Kostenko atyndaǵy shahtada jarylys bolyp, 46 shahter kóz jumdy, 28 adam túrli jaraqat aldy. Bul – milliarder Lakshmi Mittal ielik etken «ArselorMittal Temirtaý» kompaniiasynyń sońǵy 30 jyl ishindegi eń iri apaty boldy. Osy qaiǵyly oqiǵadan keiin Qazaqstan biligi kompaniiaǵa ielik etetin investordy aýystyrý týraly sheshim qabyldaǵan.
