Qaraǵandy oblysynda «Janýarlarǵa jaýapkershilikpen qaraý týraly» QR zańyna qaramastan, itterdi atý derekteri áli de tirkelip otyr. Sonyń ishinde tazy tuqymdy itterdiń joiylýy qoǵam narazylyǵyn týdyrdy. Qańtar aiynyń ortasynda bolǵan kezekti oqiǵadan keiin it ieleri sotqa júginbek, dep habarlaidy Dalanews.kz ekaraganda.kz saityna silteme jasap.
Oqiǵa Aqtas kentindegi jeke panajai aýmaǵynda tirkelgen. Bul jerde tazy tuqymdy itterdi drotikpen atyp ketý jaǵdaiy alǵash ret bolyp turǵan joq.
Panajai iesi Aleksandr Kotelianyń aitýynsha, ol bul oryndy ózi qarjylandyryp, itterdi baptap, tazy tuqymyn saqtaý isimen 20 jyldan astam ýaqyttan beri ainalysyp keledi. Alaida 13 qańtar kúni ol panajai aýmaǵynan eki ittiń óli denesin tapqan.
"Itter drotikpen atylǵan. Taǵy úsh it joǵalyp ketti. Qazir olardyń qaida ekenin bilmeimin", - deidi ol.
Aleksandr Kotelia panajaidaǵy barlyq janýarǵa ózi qarajat shyǵaratynyn aitady.
"Jem-shóbin ózim alamyn, vaktsina saldyramyn, kútim jasaimyn. Panajai aýmaǵy biik qorshalǵan, beinebaqylaý kameralary ornatylǵan. Biraq sonyń ózi itterdi qorǵap qala almady. Mundai jaǵdai alǵash ret bolyp otyrǵan joq. Itterdi atý shamamen úsh apta buryn bastaldy", - dedi panajai iesi.
Onyń sózinshe, dál osyndai oqiǵa Qaraǵandy qalasynda da tirkelgen. 15 qańtar kúni jeke úide ustalǵan tazy tuqymdy it te drotikpen atylǵan.
"Biz politsiia shaqyrdyq. Beinejazbalar arqyly itterdi atqan adam anyqtaldy. Ol vetstantsiia qyzmetkeri bolyp shyqty. Eki jaǵdaida da adam jeke menshik aýmaqqa zańsyz kirip, janýarlardy óltirgen. Men ýchaskelik politsiia inspektoryna habarlasyp, 13 qańtardaǵy beinebaqylaý jazbalaryn tekserýdi suradym. Biraq olar qaraýǵa niet bildirmedi. Iske de qozǵalys berilmedi, sotqa júginýdi usyndy. Alaida bizge belgili bolǵandai, kúdikti kinásin moiyndap, bárin rastaǵan. Qazir biz sotqa talap aryz daiyndap jatyrmyz", - dedi Aleksandr Kotelia.
Qaraǵandy oblystyq politsiia departamentiniń baspasóz qyzmeti itterdi atý deregi boiynsha aryz túskenin rastady.
Al oblystyq veterinariia basqarmasy ázirge itterdi atýǵa vetstantsiia qyzmetkeriniń qatysy baryn resmi túrde rastaǵan joq.
Aita keteiik, tazy tuqymdy itter Qazaqstannyń ulttyq murasy retinde erekshe qorǵalatyn janýarlar qataryna jatady.
