قاراعاندى وبلىسىندا «جانۋارلارعا جاۋاپكەرشىلىكپەن قاراۋ تۋرالى» ق ر زاڭىنا قاراماستان، يتتەردى اتۋ دەرەكتەرى ءالى دە تىركەلىپ وتىر. سونىڭ ىشىندە تازى تۇقىمدى يتتەردىڭ جويىلۋى قوعام نارازىلىعىن تۋدىردى. قاڭتار ايىنىڭ ورتاسىندا بولعان كەزەكتى وقيعادان كەيىن يت يەلەرى سوتقا جۇگىنبەك، دەپ حابارلايدى Dalanews.kz ekaraganda.kz سايتىنا سىلتەمە جاساپ.
وقيعا اقتاس كەنتىندەگى جەكە پاناجاي اۋماعىندا تىركەلگەن. بۇل جەردە تازى تۇقىمدى يتتەردى دروتيكپەن اتىپ كەتۋ جاعدايى العاش رەت بولىپ تۇرعان جوق.
پاناجاي يەسى الەكساندر كوتەليانىڭ ايتۋىنشا، ول بۇل ورىندى ءوزى قارجىلاندىرىپ، يتتەردى باپتاپ، تازى تۇقىمىن ساقتاۋ ىسىمەن 20 جىلدان استام ۋاقىتتان بەرى اينالىسىپ كەلەدى. الايدا 13 قاڭتار كۇنى ول پاناجاي اۋماعىنان ەكى ءيتتىڭ ءولى دەنەسىن تاپقان.
"يتتەر دروتيكپەن اتىلعان. تاعى ءۇش يت جوعالىپ كەتتى. ءقازىر ولاردىڭ قايدا ەكەنىن بىلمەيمىن"، - دەيدى ول.
الەكساندر كوتەليا پاناجايداعى بارلىق جانۋارعا ءوزى قاراجات شىعاراتىنىن ايتادى.
"جەم-شوبىن ءوزىم الامىن، ۆاكسينا سالدىرامىن، كۇتىم جاسايمىن. پاناجاي اۋماعى بيىك قورشالعان، بەينەباقىلاۋ كامەرالارى ورناتىلعان. ءبىراق سونىڭ ءوزى يتتەردى قورعاپ قالا المادى. مۇنداي جاعداي العاش رەت بولىپ وتىرعان جوق. يتتەردى اتۋ شامامەن ءۇش اپتا بۇرىن باستالدى"، - دەدى پاناجاي يەسى.
ونىڭ سوزىنشە، ءدال وسىنداي وقيعا قاراعاندى قالاسىندا دا تىركەلگەن. 15 قاڭتار كۇنى جەكە ۇيدە ۇستالعان تازى تۇقىمدى يت تە دروتيكپەن اتىلعان.
"ءبىز پوليسيا شاقىردىق. بەينەجازبالار ارقىلى يتتەردى اتقان ادام انىقتالدى. ول ۆەتستانسيا قىزمەتكەرى بولىپ شىقتى. ەكى جاعدايدا دا ادام جەكە مەنشىك اۋماققا زاڭسىز كىرىپ، جانۋارلاردى ولتىرگەن. مەن ۋچاسكەلىك پوليسيا ينسپەكتورىنا حابارلاسىپ، 13 قاڭتارداعى بەينەباقىلاۋ جازبالارىن تەكسەرۋدى سۇرادىم. ءبىراق ولار قاراۋعا نيەت بىلدىرمەدى. ىسكە دە قوزعالىس بەرىلمەدى، سوتقا جۇگىنۋدى ۇسىندى. الايدا بىزگە بەلگىلى بولعانداي، كۇدىكتى كىناسىن مويىنداپ، ءبارىن راستاعان. ءقازىر ءبىز سوتقا تالاپ ارىز دايىنداپ جاتىرمىز"، - دەدى الەكساندر كوتەليا.
قاراعاندى وبلىستىق پوليسيا دەپارتامەنتىنىڭ باسپا ءسوز قىزمەتى يتتەردى اتۋ دەرەگى بويىنشا ارىز تۇسكەنىن راستادى.
ال وبلىستىق ۆەتەريناريا باسقارماسى ازىرگە يتتەردى اتۋعا ۆەتستانسيا قىزمەتكەرىنىڭ قاتىسى بارىن رەسمي تۇردە راستاعان جوق.
ايتا كەتەيىك، تازى تۇقىمدى يتتەر قازاقستاننىڭ ۇلتتىق مۇراسى رەتىندە ەرەكشە قورعالاتىن جانۋارلار قاتارىنا جاتادى.
