Qaraǵandy oblystyq máslihatynyń depýtattary 2026–2030 jyldarǵa arnalǵan Óńirdi damytý baǵdarlamasy aiasyndaǵy investitsiialyq jospardy bekitip, 2026 jylǵa arnalǵan oblystyq biýdjetke ózgerister engizdi. Negizgi qarjy naqty sektordy qoldaýǵa qaita bólindi, dep habarlaidy Dala News.
Naqtylanǵan biýdjet jobasy oblystyq biýdjet komissiiasynyń, ákimdiktiń, qoǵamdyq keńestiń otyrystarynda jáne máslihattyń turaqty komissiialarynyń birlesken jiynynda qaraldy. Qujatta respýblikalyq biýdjetten bólinetin transfertter, memlekettik baǵaly qaǵazdar shyǵarý jáne 2025 jylǵy biýdjettiń oryndalý qorytyndylary eskerilgen.
Oblystyq ekonomika jáne biýdjettik josparlaý basqarmasynyń basshysy Dýlat Áshkenovtiń aitýynsha, bólingen qarajat esebinen turǵyn úi-kommýnaldyq sharýashylyq nysandaryn, jol infraqurylymyn jáne áleýmettik obektilerdi salý, rekonstrýktsiialaý jáne jóndeý sharalary júzege asyrylady. Sonymen qatar áleýmettik mańyzy bar baǵyttar boiynsha jolaýshylar tasymalyn, agroónerkásip keshenin, ónerkásip sektoryn jáne týrizmdi qoldaý jalǵasady. Tabiǵatty qorǵaý sharalary men kommýnaldyq menshik múlkin basqarýǵa qatysty jobalar da qarastyrylǵan.
Áleýmettik salada biýdjet qarajaty mindetti áleýmettik meditsinalyq saqtandyrý júiesi arqyly meditsinalyq kómektiń qoljetimdiligin keńeitýge, jumyspen qamtýdy qoldaýǵa, mádeniet, ishki saiasat jáne jastar saiasaty baǵytyndaǵy is-sharalarǵa jumsalmaq.
Sessiia barysynda depýtattar 2025–2027 jyldarǵa arnalǵan qorshaǵan ortany qorǵaý jónindegi is-sharalar josparynyń oryndalý esebin de qarady. Tabiǵi resýrstar jáne tabiǵat paidalanýdy retteý basqarmasynyń basshysy Bahtiiar Sanbaevtyń málimetinshe, ótken jyly Úlken Buqpa, Nura, Soqyr, Toqyraýyn ózenderiniń arnalary tazartylyp, Toǵyzqudyq jáne Jastlek gidrotehnikalyq nysandary kúrdeli jóndeýden ótken. Qaraǵandy, Balqash, Temirtaý, Saran jáne birqatar aýdandarda 15 kárizdik tazartý qurylysy men jelilerin salý jáne jańǵyrtý jobalary 2026–2027 jyldary aiaqtalmaq.
Abai qalasynda suryptaý jelisi bar zamanaýi qatty turmystyq qaldyqtar poligonynyń qurylysy aiaqtalǵan. Óńirde orman alqaptarynyń aýmaǵy ulǵaiyp, zańsyz qoqys oryndaryn joiý jumystary kezeń-kezeńimen júrgizilýde.
Sessiia qorytyndysynda oblys ákimi Ermaǵanbet Bólekpaev atqarýshy organdar men depýtattardyń ózara tyǵyz yqpaldastyǵy ǵana óńirdiń turaqty damýyn qamtamasyz etetinin atap ótti.
