Qaraǵandy oblysy Buhar-Jyraý aýdany Kókpekti aýylynda jańadan salynǵan sapasyz úilerge qatysty daý kúsheie tústi. Rezonanstan keiin merdiger kompaniia qyzmetkerleri birqatar turǵynǵa habarlasyp, “úiimizdiń jaǵdaiy jaqsy” degen videojazba túsirýdi talap ete bastaǵan. Bul týraly belgili jýrnalist Ivan Strijakov málimdedi, dep habarlaidy Dalanews.kz.
Jýrnalistiń aitýynsha, jelide taraǵan aqparattan keiin jergilikti bilik pen merdigerler turǵyndarǵa qysym kórsetýdi bastaǵan.
“Kúni keshe áleýmettik osal otbasylarǵa arnalǵan, quny 50 mln teńgege baǵalanǵan úiler týraly video jariialadym. Sol kúni-aq reaktsiia bastalǵan. Aldymen merdiger shaǵymdanǵan turǵynǵa habarlasyp, “ne úshin sózge kelip jatyrmyz?” dep aitqan. Artynsha aýdannan komissiia kelip, “taǵy da video jiber” dep talap qoiǵan”,- deidi ol.
Onyń aitýynsha, merdiger ókilderi kórshi úilerdi aralap, shaǵym joq ekenin dáleldeitin jańa videolar túsirtýdi talap etken.
“Kórshilerge baryp, “sizderde problema joq qoi, sony videoǵa túsirińizder” dep talap etken. Bul ne sumdyq?”, - dep ashýlandy ol.
Sonymen qatar ol jaǵdaidy jyly jaýyp qoiýǵa tyrysqandardy qatań synǵa aldy.
“Sizder máseleni sheshkilerińiz kele me, álde óz oryndaryńyzdy saqtap qalǵylaryńyz kele me?", - dep saýal qoidy ol.
Ákimge úndeý
Jýrnalist Buqar-Jyraý aýdanynyń ákimi Erlan Qusaiynǵa arnaiy úndeý joldap, onyń keibir qyzmetkerleri jaǵdaidy burmalap otyrǵanyn aitty.
“Erlan Besimáliuly, sizdi qurmetteimin. Biraq sizdi osylai uiatqa qaldyrýdy kózdep otyrǵandar bar sekildi. Eń mańyzdy suraq — bul úilerdi jeke tulǵadan ne úshin jáne qandai baǵamen satyp aldyńyzdar? Baǵalaý boldy ma? Tehnikalyq saraptama jasaldy ma?”, — dedi ol.
Strijakov áleýmettik úi alý baǵdarlamasyna qatysatyn otbasylar 10% bastapqy jarna tóleýi tiis ekenin eske saldy.
“Úidiń quny 24,8 mln teńge dep kórsetilgen. Demek otbasy 2,4 mln teńge tóleýi tiis. Bul — naqty baǵany jasyrý emes pe? Al sol aqshaǵa laiyq sapa bar ma?” — dedi.
Jýrnalist bilik pen merdigerlerdi turǵyndarǵa qysym kórsetýdi toqtatyp, naqty problemalardy sheshýge shaqyrdy.
“Adamdarǵa tiisýdi qoiyńyzdar. Úide ne durys emes, sony jóndeńizder. Problemany sheshýdiń ornyna video jinaýmen ainalysý — masqara jaǵdai”, — dedi ol.
Buǵan deiin
Eske sala keteiik, buǵan deiin belgili jýrnalist Ivan Strijakov Qaraǵandy oblysy Buhar-Jyraý aýdanyna qarasty Kókpekti aýylynda áleýmettik osal toptarǵa arnalǵan jańa úilerdiń sapasyna qatysty máseleni kótergen bolatyn.
Jýrnalisttiń aitýynsha, quny shamamen 50 mln teńge bolatyn baspanalardyń jaǵdaiy syn kótermeidi: úilerdiń ishi ylǵal, qabyrǵalary syz tartyp, terezelerinen sý ketedi, bólmelerdi zeń basqan. Balalary jii aýyryp jatqan turǵyndar Strijakovtan kómek suraǵan.
Onyń sózinshe, bul úiler tegin berilmeidi. Turǵyndar ai saiyn jalǵa alýǵa tóleidi, al keiin satyp alý úshin 10% alǵashqy jarna engizýi tiis. Soǵan qaramastan, baspanalardyń sapasy talapqa sai emes.
Strijakov kepildik merzimi ótpei turyp tehnikalyq saraptama taǵaiyndaýdy jáne TKSh bóliminiń jaýapkershiligin tekserýdi talap etken.
Turǵyndar da úi tapsyrylǵan kúnnen bastap aqaýlar toqtamaǵanyn aityp shaǵymdanǵan:
- esiktiń asty ashyq, sýyq jel soǵady;
- terezeler terleidi, buryshtardy zeń basqan;
- qabyrǵalar jarylyp jatyr;
- sý qubyrlary durys bekitilmegen, jýynatyn bólmede sý atqylaǵan;
- jeldetkishten sý tamshylaidy.
Olar TKSh bólimine birneshe ret júgingenimen, naqty jumystar atqarylmaǵanyn aitqan edi.
“Bizdiń jalǵyz talabymyz – ýáde etilgen jumysty oryndaý. Artyq nárse suramaimyz”, - degen bolatyn turǵyndar.
