Qaraǵandy oblysynda poiyz basyp ketken besinshi qyzmetkerdiń qaza tapqany týraly aqparat tarady, dep habarlaidy Dalanews.kz.
Buǵan deiin Qaraǵandy oblysynda júk poiyzy «QTJ» jol brigadasyn qaǵyp ketip, tórt qyzmetkerdiń oqiǵa ornynda qaza tapqany habarlanǵan edi. Keiin birqatar derekkózder aýyr jaraqat alǵan besinshi qyzmetkerdiń aýrýhanada kóz jumǵanyn málimdedi.
Alaida «Qazaqstan temir joly» bul aqparatty resmi túrde joqqa shyǵardy. Kompaniianyń habarlaýynsha, besinshi qyzmetkerdiń qaitys bolǵany týraly málimet shyndyqqa sáikes kelmeidi.
«Oqiǵa saldarynan úsh qyzmetker ómirine qaýip tóndirmeitin jaraqat alǵan. Olar qabyrǵa men qol súieginiń synýy diagnozymen meditsinalyq kómek alyp, qazirgi ýaqytta eńbekke ýaqytsha jaramsyzdyq paraǵymen emdelip jatyr», – delingen QTJ-nyń resmi jaýabynda.
Kompaniia ókilderiniń aitýynsha, zardap shekken qyzmetkerlerdiń jaǵdaiy turaqty, qalpyna kelý kezeńinen ótýde.
Qaiǵyly oqiǵanyń mán-jaiy boiynsha tiisti tekserý júrgizilip jatyr. Quzyrly organdar apattyń naqty sebepterin anyqtaýda.
