قاراعاندى وبلىسىندا پويىز باسىپ كەتكەن بەسىنشى قىزمەتكەردىڭ قازا تاپقانى تۋرالى اقپارات تارادى، دەپ حابارلايدى Dalanews.kz.
بۇعان دەيىن قاراعاندى وبلىسىندا جۇك پويىزى «قتج» جول بريگاداسىن قاعىپ كەتىپ، ءتورت قىزمەتكەردىڭ وقيعا ورنىندا قازا تاپقانى حابارلانعان ەدى. كەيىن ءبىرقاتار دەرەككوزدەر اۋىر جاراقات العان بەسىنشى قىزمەتكەردىڭ اۋرۋحانادا كوز جۇمعانىن مالىمدەدى.
الايدا «قازاقستان تەمىر جولى» بۇل اقپاراتتى رەسمي تۇردە جوققا شىعاردى. كومپانيانىڭ حابارلاۋىنشا، بەسىنشى قىزمەتكەردىڭ قايتىس بولعانى تۋرالى مالىمەت شىندىققا سايكەس كەلمەيدى.
«وقيعا سالدارىنان ءۇش قىزمەتكەر ومىرىنە ءقاۋىپ توندىرمەيتىن جاراقات العان. ولار قابىرعا مەن قول سۇيەگىنىڭ سىنۋى دياگنوزىمەن مەديسينالىق كومەك الىپ، قازىرگى ۋاقىتتا ەڭبەككە ۋاقىتشا جارامسىزدىق پاراعىمەن ەمدەلىپ جاتىر»، – دەلىنگەن قتج-نىڭ رەسمي جاۋابىندا.
كومپانيا وكىلدەرىنىڭ ايتۋىنشا، زارداپ شەككەن قىزمەتكەرلەردىڭ جاعدايى تۇراقتى، قالپىنا كەلۋ كەزەڭىنەن وتۋدە.
قايعىلى وقيعانىڭ ءمان-جايى بويىنشا ءتيىستى تەكسەرۋ جۇرگىزىلىپ جاتىر. قۇزىرلى ورگاندار اپاتتىڭ ناقتى سەبەپتەرىن انىقتاۋدا.
