Áleýmettik jelide Qazaqstannyń tuńǵysh prezidentiniń úlken qyzy Dariǵa Nazarbaevamen bailanystyrylatyn Londondaǵy qymbat záýlim úidiń jańa sýretteri tarady. Birneshe jyldan beri satylymda turǵan elitalyq jyljymaityn múlikke áli kúnge deiin satyp alýshy tabylmaǵan, dep dalanews.kz tilshisi Ulysmedia.kz saityna silteme jasap habarlaidy.
Záýlim úi Londonnyń bedeldi aýdandarynyń biri – Denvýd-roýd kóshesinde, Highgate golf-klýbynyń mańynda ornalasqan. Ol alǵash ret 2022 jyldyń naýryz aiynda, Qazaqstandaǵy Qańtar oqiǵasynan keiin kóp uzamai satylymǵa shyǵarylǵan. Bastapqyda nysannyń quny 11,8 million dollar dep baǵalansa, qazir onyń baǵasy 10,5 million dollarǵa deiin tómendegen.
Jalpy aýmaǵy shamamen 765 sharshy metrdi quraityn úide jeti jatyn bólme, alty jýynatyn bólme, birneshe qonaq bólmesi, bassein, biliard zaly jáne qysqy baq qarastyrylǵan.
Jariialanǵan fotosýretterde sándi interermen qatar qazaqy naqyshtaǵy buiymdar da kózge túsedi. Qymbat jihazdardyń arasynda qazaqy kilemder men kórpelerdiń bolýy áleýmettik jeli qoldanýshylarynyń qyzý talqysyna sebep boldy.
Bul jyljymaityn múliktiń Dariǵa Nazarbaevamen bailanystyrylatyny 2020 jyly belgili bolǵan. Sol kezde Ulybritaniianyń Ulttyq qylmysqa qarsy agenttigi atalǵan úidi jáne taǵy eki jyljymaityn múlik nysanyn buǵattap, olardy satyp alýǵa jumsalǵan qarajattyń zańdy shyǵý tegin túsindirýdi talap etken.
Keiin London soty múlikke qoiylǵan shekteýdi alyp tastady. Nazarbaevanyń ókilderi jyljymaityn múlik zańdy tabysqa, sonyń ishinde «Qant» kompaniiasynyń aktsiialaryn satýdan túsken qarajat esebinen satyp alynǵanyn málimdegen. Sot usynylǵan dálelderdi qarastyryp, múlikti buǵattaýdy jalǵastyrýǵa jetkilikti negiz joq degen sheshim shyǵarǵan.
