Atyraý oblysynda Qarabalinder áýletiniń qazasyna qatysty rezonans týdyrǵan qylmystyq is boiynsha sot protsesi bastaldy. Is aiasynda Sultan Sársemálievke aýyr aiyptar taǵylyp otyr, dep habarlaidy dalanews.kz.
Sot otyrysynda Atyraý oblysy Politsiia departamenti Tergeý basqarmasynyń asa mańyzdy ister jónindegi aǵa tergeýshisi Temirhan Qajymuratov qylmystyń qalai ashylǵanyn baiandady.
Onyń aitýynsha, tergeý barysynda 40-tan astam adamnan jaýap alynǵan. Olardyń qatarynda marqumdardyń jaqyndary, kórshileri jáne iske qatysty málimet berýi múmkin basqa da azamattar bolǵan.
Tergeýdiń bastapqy kezeńinde erli-zaiypty iz-túzsiz joǵalǵandar retinde tirkelgen. Osydan keiin politsiia olardyń bank esepshottaryn tekserip, qarjy qozǵalysyn saralaǵan.
Tergeýshiniń sózinshe, tekserý barysynda kúdikti Sultan Sársemálievtiń esepshotyna birneshe ret aqsha aýdarylǵany anyqtalǵan. Bul derek isti ashýdaǵy mańyzdy jaittardyń biri bolǵan.
Keiin politseiler erli-zaiyptyny aýylǵa jetkizgen taksi júrgizýshisin de anyqtaǵan. Onyń aitýynsha, ótken jyldyń qarasha aiynda ol erli-zaiyptyny jáne balalaryn aýylǵa aparǵan. Al keri qaitar jolda kólikte Meiramgúl Muqanǵalieva bolǵan.
Qazir sotta qylmystyq istiń barlyq mán-jaiy jan-jaqty qaralyp jatyr. Tergeý taraby bul isti asa aýyr qylmys retinde baǵalap otyr. Aiyptalýshynyń kinási men oǵan qatysty túpkilikti sheshimdi sot shyǵarady.
