Qaraǵandy oblysynda «Kitap oqityn ult» aýqymdy aǵartýshylyq jobasynyń qorytyndysy shyǵaryldy. Qysqa ýaqyt ishinde bul bastama jai ǵana baiqaý sheńberinen shyǵyp, óńirde keń aýqymdy oqý qozǵalysyna ainaldy. Oqyrman mádenietin damytýǵa, halyqtyń ziiatkerlik áleýetin arttyrýǵa jáne rýhani qundylyqtardy dáripteýge baǵyttalǵan joba jurtshylyqtyń úlken qoldaýyna ie boldy, dep habarlaidy Dalanews.kz.
Jobaǵa oblys boiynsha 67 myńnan astam adam qatysyp, kitapqa degen erekshe qyzyǵýshylyqtyń bar ekenin kórsetti. Olardyń qatarynda oqýshylar, ustazdar, memlekettik qyzmetshiler, eńbek ujymdary, joǵary oqý oryndary men kolledj stýdentteri, sondai-aq tutas otbasylar bar.
Joba Memleket basshysynyń bastamasymen pilottyq formatta Qaraǵandy oblysynda iske qosyldy. Eń joǵary qamtý kórsetkishi dál Qaraǵandy óńirinde tirkeldi.
Baiqaý qazaq jáne orys ligalary boiynsha eki baǵytta, sondai-aq alty nominatsiia aiasynda ótti. Qatysýshylar sarapshylar usynǵan 15 shyǵarmany oqyp, elektrondy oqyrman kúndeligin júrgizdi. Onda ár kitapqa taldaý jasap, alǵan áserleri men oilaryn bólisti. Irikteý kezeńi testileý formatynda ótip, úzdikter oblystyq deńgeidegi ziiatkerlik saiysqa joldama aldy.
Eń aýqymdy sanattardyń biri — «Kitap oqityn áýlet» nominatsiiasy boldy. Bul baǵytta myńdaǵan otbasy baq synap, olardyń ishinde Shalqarovtar áýleti júldeli orynǵa ie boldy. Qatysýshylardyń aitýynsha, bul joba otbasylyq kitap oqý dástúrin nyǵaityp, balalardyń kitapqa degen qyzyǵýshylyǵyn arttyrýǵa yqpal etken.
Jeńimpazdardy marapattaý rásimi 23 sáýir — Ulttyq kitap kúnine orai ótti. Barlyq sanattar boiynsha úzdikterge qomaqty aqshalai syilyqtar tabystaldy: birinshi oryn — 1 mln teńge, ekinshi oryn — 600 myń teńge, úshinshi oryn — 400 myń teńge.
Joba aiasynda tek bilim ǵana emes, jańa oqý mádenieti qalyptasa bastady. Qatysýshylar arasynda syni oilaý, taldaý jasaý, pikir bildirý daǵdylary damyp, kitaptyń qoǵamdaǵy róli qaita aiqyndala tústi.
Oblys ákimi Ermaǵanbet Bólekpaev bul bastamanyń mańyzdylyǵyn erekshe atap ótti. Onyń aitýynsha, joba halyqtyń kitapqa degen qyzyǵýshylyǵynyń joǵary ekenin dáleldep, sanaly túrde damý jolyn tańdaǵan qoǵamnyń qalyptasyp kele jatqanyn kórsetti.
— Olai bolsa, osynaý igi bastama mindetti túrde jalǵasyn tabý kerek! Búkil óńir jurtshylyǵyn ortaq muratqa jumyldyrǵan joba halyq sanasyna serpin beretin úlken qozǵalysqa ainalsyn! — dedi oblys ákimi.
Sonymen qatar óńirde kitap oqýǵa qolaily jaǵdai jasaý baǵytynda da naqty qadamdar júzege asýda. Qaraǵandy qalasynda jańa qoǵamdyq kitaphanalar ashylyp, bolashaqta zamanaýi kitap keńistikterin qurý josparlanýda.
Búginde «Kitap oqityn ult» jobasy jai ǵana baiqaý emes, qoǵamda intellektýaldy básekelestik qalyptastyratyn, bilim men rýhaniiatty dáripteitin mańyzdy qozǵalysqa ainaldy.
Igi bastama Qaraǵandy oblysynda jalǵasyn tappaq.
