قاراعاندى وبلىسىندا «كٸتاپ وقيتىن ۇلت» اۋقىمدى اعارتۋشىلىق جوباسىنىڭ قورىتىندىسى شىعارىلدى. قىسقا ۋاقىت ٸشٸندە بۇل باستاما جاي عانا بايقاۋ شەڭبەرٸنەن شىعىپ, ٶڭٸردە كەڭ اۋقىمدى وقۋ قوزعالىسىنا اينالدى. وقىرمان مەدەنيەتٸن دامىتۋعا, حالىقتىڭ زيياتكەرلٸك ەلەۋەتٸن ارتتىرۋعا جەنە رۋحاني قۇندىلىقتاردى دەرٸپتەۋگە باعىتتالعان جوبا جۇرتشىلىقتىڭ ٷلكەن قولداۋىنا يە بولدى, دەپ حابارلايدى Dalanews.kz.
جوباعا وبلىس بويىنشا 67 مىڭنان استام ادام قاتىسىپ, كٸتاپقا دەگەن ەرەكشە قىزىعۋشىلىقتىڭ بار ەكەنٸن كٶرسەتتٸ. ولاردىڭ قاتارىندا وقۋشىلار, ۇستازدار, مەملەكەتتٸك قىزمەتشٸلەر, ەڭبەك ۇجىمدارى, جوعارى وقۋ ورىندارى مەن كوللەدج ستۋدەنتتەرٸ, سونداي-اق تۇتاس وتباسىلار بار.
جوبا مەملەكەت باسشىسىنىڭ باستاماسىمەن پيلوتتىق فورماتتا قاراعاندى وبلىسىندا ٸسكە قوسىلدى. ەڭ جوعارى قامتۋ كٶرسەتكٸشٸ دەل قاراعاندى ٶڭٸرٸندە تٸركەلدٸ.
بايقاۋ قازاق جەنە ورىس ليگالارى بويىنشا ەكٸ باعىتتا, سونداي-اق التى نوميناتسييا اياسىندا ٶتتٸ. قاتىسۋشىلار ساراپشىلار ۇسىنعان 15 شىعارمانى وقىپ, ەلەكتروندى وقىرمان كٷندەلٸگٸن جٷرگٸزدٸ. وندا ەر كٸتاپقا تالداۋ جاساپ, العان ەسەرلەرٸ مەن ويلارىن بٶلٸستٸ. ٸرٸكتەۋ كەزەڭٸ تەستٸلەۋ فورماتىندا ٶتٸپ, ٷزدٸكتەر وبلىستىق دەڭگەيدەگٸ زيياتكەرلٸك سايىسقا جولداما الدى.
ەڭ اۋقىمدى ساناتتاردىڭ بٸرٸ — «كٸتاپ وقيتىن ەۋلەت» نوميناتسيياسى بولدى. بۇل باعىتتا مىڭداعان وتباسى باق سىناپ, ولاردىڭ ٸشٸندە شالقاروۆتار ەۋلەتٸ جٷلدەلٸ ورىنعا يە بولدى. قاتىسۋشىلاردىڭ ايتۋىنشا, بۇل جوبا وتباسىلىق كٸتاپ وقۋ دەستٷرٸن نىعايتىپ, بالالاردىڭ كٸتاپقا دەگەن قىزىعۋشىلىعىن ارتتىرۋعا ىقپال ەتكەن.
جەڭٸمپازداردى ماراپاتتاۋ رەسٸمٸ 23 سەۋٸر — ۇلتتىق كٸتاپ كٷنٸنە وراي ٶتتٸ. بارلىق ساناتتار بويىنشا ٷزدٸكتەرگە قوماقتى اقشالاي سىيلىقتار تابىستالدى: بٸرٸنشٸ ورىن — 1 ملن تەڭگە, ەكٸنشٸ ورىن — 600 مىڭ تەڭگە, ٷشٸنشٸ ورىن — 400 مىڭ تەڭگە.
جوبا اياسىندا تەك بٸلٸم عانا ەمەس, جاڭا وقۋ مەدەنيەتٸ قالىپتاسا باستادى. قاتىسۋشىلار اراسىندا سىني ويلاۋ, تالداۋ جاساۋ, پٸكٸر بٸلدٸرۋ داعدىلارى دامىپ, كٸتاپتىڭ قوعامداعى رٶلٸ قايتا ايقىندالا تٷستٸ.
وبلىس ەكٸمٸ ەرماعانبەت بٶلەكپاەۆ بۇل باستامانىڭ ماڭىزدىلىعىن ەرەكشە اتاپ ٶتتٸ. ونىڭ ايتۋىنشا, جوبا حالىقتىڭ كٸتاپقا دەگەن قىزىعۋشىلىعىنىڭ جوعارى ەكەنٸن دەلەلدەپ, سانالى تٷردە دامۋ جولىن تاڭداعان قوعامنىڭ قالىپتاسىپ كەلە جاتقانىن كٶرسەتتٸ.
— ولاي بولسا, وسىناۋ يگٸ باستاما مٸندەتتٸ تٷردە جالعاسىن تابۋ كەرەك! بٷكٸل ٶڭٸر جۇرتشىلىعىن ورتاق مۇراتقا جۇمىلدىرعان جوبا حالىق ساناسىنا سەرپٸن بەرەتٸن ٷلكەن قوزعالىسقا اينالسىن! — دەدٸ وبلىس ەكٸمٸ.
سونىمەن قاتار ٶڭٸردە كٸتاپ وقۋعا قولايلى جاعداي جاساۋ باعىتىندا دا ناقتى قادامدار جٷزەگە اسۋدا. قاراعاندى قالاسىندا جاڭا قوعامدىق كٸتاپحانالار اشىلىپ, بولاشاقتا زاماناۋي كٸتاپ كەڭٸستٸكتەرٸن قۇرۋ جوسپارلانۋدا.
بٷگٸندە «كٸتاپ وقيتىن ۇلت» جوباسى جاي عانا بايقاۋ ەمەس, قوعامدا ينتەللەكتۋالدى بەسەكەلەستٸك قالىپتاستىراتىن, بٸلٸم مەن رۋحانيياتتى دەرٸپتەيتٸن ماڭىزدى قوزعالىسقا اينالدى.
يگٸ باستاما قاراعاندى وبلىسىندا جالعاسىن تاپپاق.
