Qaraǵandy ​​oblysynyń Botaqara kentinde turǵyn úıde turmystyq gaz balony jaryldy. Qutqarýshylar qulaǵan úı qırandylarynyń astynan eki adamnyń denesin alyp shyqty, dep habarlaıdy Dalanews.kz.

Oqıǵadan 5 adam zardap shekse, onyń úsheýi — bala.

Aıta keteıik, tótenshe oqıǵa 30 qańtarda saǵat 00:07-de eki qabatty, eki kireberisi bar 12 páterli turǵyn úıdiń ekinshi qabatynda ornalasqan páterde boldy. Páterdiń tóbesi men qabyrǵalary tolyq opyrylyp qaldy. Birinshi qabattaǵy páterlerge de aıtarlyqtaı zaqym kelgen.

Turǵyn úı 2014 jyly salynǵan. Jalpy aýdany — 510 sharshy metr. Munda 46 adam turady, jarylys kezinde 35 adam bolǵan.

Saǵat 00:11-den 03:37-ge deıingi aralyqta júrgen qutqarý jumystary kezinde qırandylar astynan qaza bolǵan eki adamnyń denesi shyǵaryldy. Jaraqat alǵan bes adam túrli dene jaraqattarymen Buqar jyraý aýdandyq aýrýhanaǵa jetkizildi, onyń úsheýi — bala. 25 azamatqa jedel psıhologıalyq kómek kórsetildi, — dep habarlady oblystyq TJD baspasóz qyzmetinen.

Tótenshe jaǵdaılar departamentinde 8-7212-517223 nomeri boıynsha jedel jeli iske qosyldy.

Oqıǵa ornynda jedel shtab quryldy. Jumysqa 139 adam men 32 tehnıka jumyldyrylǵan.