قاراعاندى ​​وبلىسىنىڭ بوتاقارا كەنتىندە تۇرعىن ۇيدە تۇرمىستىق گاز بالونى جارىلدى. قۇتقارۋشىلار قۇلاعان ءۇي قيراندىلارىنىڭ استىنان ەكى ادامنىڭ دەنەسىن الىپ شىقتى، دەپ حابارلايدى Dalanews.kz.

وقيعادان 5 ادام زارداپ شەكسە، ونىڭ ۇشەۋى — بالا.

ايتا كەتەيىك، توتەنشە وقيعا 30 قاڭتاردا ساعات 00:07-دە ەكى قاباتتى، ەكى كىرەبەرىسى بار 12 پاتەرلى تۇرعىن ءۇيدىڭ ەكىنشى قاباتىندا ورنالاسقان پاتەردە بولدى. پاتەردىڭ توبەسى مەن قابىرعالارى تولىق وپىرىلىپ قالدى. ءبىرىنشى قاباتتاعى پاتەرلەرگە دە ايتارلىقتاي زاقىم كەلگەن.

تۇرعىن ءۇي 2014 جىلى سالىنعان. جالپى اۋدانى — 510 شارشى مەتر. مۇندا 46 ادام تۇرادى، جارىلىس كەزىندە 35 ادام بولعان.

ساعات 00:11-دەن 03:37-گە دەيىنگى ارالىقتا جۇرگەن قۇتقارۋ جۇمىستارى كەزىندە قيراندىلار استىنان قازا بولعان ەكى ادامنىڭ دەنەسى شىعارىلدى. جاراقات العان بەس ادام ءتۇرلى دەنە جاراقاتتارىمەن بۇقار جىراۋ اۋداندىق اۋرۋحاناعا جەتكىزىلدى، ونىڭ ۇشەۋى — بالا. 25 ازاماتقا جەدەل پسيحولوگيالىق كومەك كورسەتىلدى، — دەپ حابارلادى وبلىستىق تجد باسپا ءسوز قىزمەتىنەن.

توتەنشە جاعدايلار دەپارتامەنتىندە 8-7212-517223 نومەرى بويىنشا جەدەل جەلى ىسكە قوسىلدى.

وقيعا ورنىندا جەدەل شتاب قۇرىلدى. جۇمىسقا 139 ادام مەن 32 تەحنيكا جۇمىلدىرىلعان.