Májilis depýtaty Aidos Sarym Ýkrainadaǵy «qara tizimge» engizilýine qatysty redaktsiia tilshisiniń suraǵyna jaýap berdi, dep habarlaidy Dalanews.kz.
Aidos Sarymnyń aitýynsha, sheteldegi qandai da bir tizimder onyń qyzmetine nemese ustanymyna áser etpeidi, ári ol bul máseleni jeke ózi úshin mańyzdy dep sanamaidy.
«Eń bastysy – Qazaqstannyń qara tiziminde bolmasam boldy. Maǵan Resei men Ýkraina halqy kerek emes, olardyń bir-birimen soǵysqany da qyzyq emes. Meni tek Qazaqstannyń jaǵdaiy, bizdiń eldiń qaýipsizdigi men bolashaǵy ǵana alańdatady», – dedi depýtat.
Sarym bul máselege bailanysty Syrtqy ister ministrligine júginbegenin de aitty. Onyń sózinshe, Ýkrainada soǵys jaǵdaiynda jumys istep jatqan diplomattardy qosymsha máselemen alańdatýdyń qajeti joq.
«Diplomattarǵa júk artýdyń keregi ne? Olar qazir Kievte aýyr jaǵdaida otyr, óz problemalary jetkilikti», – dedi ol.
Depýtat áleýmettik jeliler men mediada bul taqyryptyń keńinen talqylanýyna da túsinbeitinin jetkizdi. Onyń pikirinshe, áńgime qandai da bir memlekettik sheshim týraly emes, jekelegen saittyń bastamasy jóninde ǵana bolyp otyr.
Aita keteiik, buǵan deiin Dala News redaktsiiasy Aidos Sarymnyń esimi Ýkrainadaǵy «Mirotvorets» saitynyń bazasynda paida bolǵany jóninde jazǵan bolatyn. Atalǵan saitta depýtatqa qatysty «gýmanitarlyq agressiiaǵa qatysy bar», «reseilik narrativterdi taratty» degen sipattaǵy aiyptaýlar keltirilgen.
Alaida Aidos Sarym bul tujyrymdarǵa jeke-jeke toqtalýdan bas tartyp, ózine taǵylǵan aiyptardy praktikalyq máni joq baǵalar dep esepteitinin aitty. Onyń sózinshe, Qazaqstan ishindegi máseleler men el múddesi – kez kelgen syrtqy baǵalaýdan áldeqaida mańyzdy.
