Qapshaǵaida qyzanaq ósiretin jylyjai iske qosyldy
Nysannyń ashylý saltanatynda sóilegen Qapshaǵai qalasynyń ákimi Nurlan Qumataev Qapshaǵai qalasyndaǵy ónerkásip óniminiń kólemi 107,4 mlrd. teńge bolsa, aýyl sharýashylyǵynda óndirilgen ónim 21,3 mlrd. teńgege jetkenin aitty.
– Sizderdi Qazaqstan Respýblikasy Táýelsizdiginiń 30 jyldyǵymen shyn júrekten quttyqtaimyn! Táýelsizdiktiń arqasynda ekonomikanyń barlyq salasynda ósimge qol jetkizildi. Máselen, bizdiń Qapshaǵai qalasynda ónerkásip te, aýyl sharýashylyǵy da qatar órkendep keledi. Qazirgi kezde 325 sharýashylyq jumys isteidi, egis alqaby 13 myń gektardan asty. Aýyl sharýashylyǵyndaǵy jalpy ónim kólemi 22,6 mlrd. teńge, bul ótken jylmen salystyrǵanda 1 mlrd. teńgege artyq. Búgin óńirdegi agroónerkásip keshenin damytýdaǵy taǵy bir mańyzdy nysan – «LSTAgro» jylyjai keshenin ashyp otyrmyz. Sonyń arqasynda Qapshaǵaidyń ekonomikasyna 3,5 mlrd. teńge tartyldy. Zamanaýi nysan halyqty sapaly otandyq aýyl sharýashylyǵy ónimderimen qamtamasyz etýge úlken úlesin qosady dep senemiz, – dedi N. Qumataev.
Jylyjai kesheniniń basshysy Samat Muhamediiarovtyń aitýynsha, jylyjaidy damytý jumystaryn 2013 jyldan bastaǵan. Bul rette «Biznestiń jol kartasy» memlekettik baǵdarlamasy arqyly qoldaýǵa ie bolyp, 1 mlrd. teńge aldy.
– 2013 jyldan bastap barlyǵy 4 kezeńde jylyjaidyń irgesin keńeittik. Qazir «LSTAgro» jylyjai kesheninde 150-dei adam eńbek etedi. Jarty jylda turǵyzylǵan jańa keshende qyzanaq ósirýge arnalǵan qural-jabdyqtar ornatylǵan. Biz tamshylatyp sýarý tásilin, gollandiialyq tehnologiiany qoldanamyz. Al tozańdanýdy jaqsartý úshin Gollandiiadan aralar ákeldik. Qańtarda jańa jylyjaidyń qyzanaqtaryn satylymǵa shyǵara bastaimyz. Bir qatarǵa shamamen 180 túp qyzanaq otyrǵyzylǵan, bir sabaǵy 150 metr, ekinshi sabaǵy shamamen 140 metr bolady. Ónimdiligi orta eseppen alǵanda ár gektarynan 90 tonna shyǵady. Jylyna 2-2,5 myń tonna sapaly ónim jinaýdy josparlap otyrmyz. Jylyjaida qyzanaq pen baklajan ósirip otyrmyz. Jalpy ónimderimiz Almaty, Nur-Sultan qalalarynyń saýda núktelerine shyǵaryp, Reseidiń naryǵyna jetkiziledi. Belarýsqa eksportqa shyǵarý týraly usynystar da bar. Aldaǵy jyldarda «Baǵdarsham» sortty buryshtar men qiiar ósirýdi qolǵa alamyz, – dedi S.Muhamediiarov aldaǵy josparlary jaily baiandap.
Qapshaǵai qalasy ákimdiginiń habarlaýynsha, «LSTAgro» JShS-nyń kezekti jylyjai kesheniniń 4 kezegin túgel iske qosýdyń arqasynda bir jylda 4-4,5 myń tonna ónim óndiriletin bolady.
