تاۋەلسىزدىكتىڭ 30 جىلدىعى قارساڭىندا قاپشاعاي قالاسىندا قۋاتتىلىعى جىلىنا 2500 توننا ءونىم شىعارۋعا جەتەتىن، 4 گا الاڭدى الىپ جاتقان جىلىجاي كەشەنى ىسكە قوسىلدى. بۇل – قىزاناق وسىرەتىن جىلىجايدىڭ 4ء-شى كەزەگىنىڭ پايدالانۋعا بەرىلۋى. مۇندا تاعى 70 ادام جۇمىسقا قابىلدانىپ، 3،5 ملرد. تەڭگە ينۆەستيسيا تارتىلدى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ. 

نىساننىڭ اشىلۋ سالتاناتىندا سويلەگەن قاپشاعاي قالاسىنىڭ اكىمى نۇرلان قۇماتايەۆ قاپشاعاي قالاسىنداعى ونەركاسىپ ءونىمىنىڭ كولەمى 107،4 ملرد. تەڭگە بولسا، اۋىل شارۋاشىلىعىندا وندىرىلگەن ءونىم 21،3 ملرد. تەڭگەگە جەتكەنىن ايتتى.

– سىزدەردى قازاقستان رەسپۋبليكاسى تاۋەلسىزدىگىنىڭ 30 جىلدىعىمەن شىن جۇرەكتەن قۇتتىقتايمىن! تاۋەلسىزدىكتىڭ ارقاسىندا ەكونوميكانىڭ بارلىق سالاسىندا وسىمگە قول جەتكىزىلدى. ماسەلەن، ءبىزدىڭ قاپشاعاي قالاسىندا ونەركاسىپ تە، اۋىل شارۋاشىلىعى دا قاتار وركەندەپ كەلەدى. قازىرگى كەزدە 325 شارۋاشىلىق جۇمىس ىستەيدى، ەگىس القابى 13 مىڭ گەكتاردان استى. اۋىل شارۋاشىلىعىنداعى جالپى ءونىم كولەمى 22،6 ملرد. تەڭگە، بۇل وتكەن جىلمەن سالىستىرعاندا 1 ملرد. تەڭگەگە ارتىق. بۇگىن وڭىردەگى اگروونەركاسىپ كەشەنىن دامىتۋداعى تاعى ءبىر ماڭىزدى نىسان – «LSTAگرو» جىلىجاي كەشەنىن اشىپ وتىرمىز. سونىڭ ارقاسىندا قاپشاعايدىڭ ەكونوميكاسىنا 3،5 ملرد. تەڭگە تارتىلدى. زاماناۋي نىسان حالىقتى ساپالى وتاندىق اۋىل شارۋاشىلىعى ونىمدەرىمەن قامتاماسىز ەتۋگە ۇلكەن ۇلەسىن قوسادى دەپ سەنەمىز، – دەدى ن. قۇماتايەۆ.

جىلىجاي كەشەنىنىڭ باسشىسى سامات مۇحامەدياروۆتىڭ ايتۋىنشا، جىلىجايدى دامىتۋ جۇمىستارىن 2013 جىلدان باستاعان. بۇل رەتتە «بيزنەستىڭ جول كارتاسى» مەملەكەتتىك باعدارلاماسى ارقىلى قولداۋعا يە بولىپ، 1 ملرد. تەڭگە الدى.

– 2013 جىلدان باستاپ بارلىعى 4 كەزەڭدە جىلىجايدىڭ ىرگەسىن كەڭەيتتىك. ءقازىر «LSTAگرو» جىلىجاي كەشەنىندە 150-دەي ادام ەڭبەك ەتەدى. جارتى جىلدا تۇرعىزىلعان جاڭا كەشەندە قىزاناق وسىرۋگە ارنالعان قۇرال-جابدىقتار ورناتىلعان. ءبىز تامشىلاتىپ سۋارۋ ءتاسىلىن، گوللانديالىق تەحنولوگيانى قولدانامىز. ال توزاڭدانۋدى جاقسارتۋ ءۇشىن گوللانديادان ارالار اكەلدىك. قاڭتاردا جاڭا جىلىجايدىڭ قىزاناقتارىن ساتىلىمعا شىعارا باستايمىز. ءبىر قاتارعا شامامەن 180 ءتۇپ قىزاناق وتىرعىزىلعان، ءبىر ساباعى 150 مەتر، ەكىنشى ساباعى شامامەن 140 مەتر بولادى. ونىمدىلىگى ورتا ەسەپپەن العاندا ءار گەكتارىنان 90 توننا شىعادى. جىلىنا 2-2،5 مىڭ توننا ساپالى ءونىم جيناۋدى جوسپارلاپ وتىرمىز. جىلىجايدا قىزاناق پەن باكلاجان ءوسىرىپ وتىرمىز. جالپى ونىمدەرىمىز الماتى، نۇر-سۇلتان قالالارىنىڭ ساۋدا نۇكتەلەرىنە شىعارىپ، رەسەيدىڭ نارىعىنا جەتكىزىلەدى. بەلارۋسقا ەكسپورتقا شىعارۋ تۋرالى ۇسىنىستار دا بار. الداعى جىلداردا «باعدارشام» سورتتى بۇرىشتار مەن قيار ءوسىرۋدى قولعا الامىز، – دەدى س.مۇحامەدياروۆ الداعى جوسپارلارى جايلى بايانداپ.

قاپشاعاي قالاسى اكىمدىگىنىڭ حابارلاۋىنشا، «LSTAگرو» جشس-نىڭ كەزەكتى جىلىجاي كەشەنىنىڭ 4 كەزەگىن تۇگەل ىسكە قوسۋدىڭ ارقاسىندا ءبىر جىلدا 4-4،5 مىڭ توننا ءونىم وندىرىلەتىن بولادى.