Nariman Ábilshaiyqovtyń sózinshe, Qapshaǵai qalasyndaǵy KQKO Almaty oblysynda aýdandyq jáne qalalyq deńgeide ashylǵan tuńǵysh ortalyq bolyp tabylady.
– Bul ortalyqtyń ashylýy Qapshaǵai kásipkerlerine tolyq qyzmet kórsetip qana qoimai, sonymen birge Balqash jáne Kerbulaq aýdanynyń kásipkerlerine de tiisti qyzmet kórsetýge múmkindik beredi. Aldaǵy ýaqytta mundai ortalyqty Talǵar men Qarasai aýdandarynda da ashýdy josparlap otyrmyz. Osylaisha, bizdiń qyzmet Almaty óńirindegi kásipkerler úshin odan ary qoljetimdi jáne qolaily bolady, – dep atap ótti oblystyq Palata basshysy.
Kásipkerlerge qyzmet kórsetý ortalyǵynda «bir tereze» printsipi boiynsha býhgalterlik, zańgerlik, marketingtik qyzmetter, memlekettik satyp alý, kásipkerlikti qoldaýǵa arnalǵan memlekettik baǵdarlamalar boiynsha keńester beriledi.
Taǵy aita ketetin másele ortalyq memlekettik organdar ókilderi kásipkerlerdi sáýlet jáne qala qurylysy, jer qatynastary máseleleri boiynsha qabyldap, qyzmet kórsetedi. Sonymen birge munda «Biznes mektep» komponenti boiynsha kásipkerlik negizderine oqytý men seminarlardy udaiy júrgizilip turmaqshy.
Ortalyq janynda qalalyq kásipkerler keńesiniń bólmesi jáne memlekettik organdardyń qabyldaý júrgizýine arnalǵan kásipkerlerdi qabyldaý bólmesi ashyldy.
Óz kezeginde Qapshaǵai qalasy ákimi Talǵat Qainarbekov kásipkerlikti qoldaý jumystyń asa mańyzdy mindeti ekenin atap ótti. Qazirgi tańda Qapshaǵaida 3,6 myńnan astam shaǵyn jáne orta kásipkerlik sýbektisinde 16,5 myńnan astam adam jumys isteidi.
– Kásipkerlerge qyzmet kórsetý ortalyǵynyń qurylýy qalamyzda jumys istep turǵan kásipkerlerge jáne kásipkerlik yntasy bar azamattarǵa qolaily jaǵdai týǵyzatytyna senimdimin. Osy ortalyqta kásipkerler óz jobasy men isin qarjylandyrýǵa qatysty qajetti barlyq málimetti ala alady. Sondyqtan Kásipkerlerge qyzmet kórsetý ortalyǵy Qapshaǵaidaǵy kásipkerliktiń tiimdi damýyna yqpal etetine senimdimiz, – dedi Talǵat Qainarbekov.
Aita keteiik, biyl Kásipkerler palatasynyń Qapshaǵai qalalyq filialy kásipkerlerge 500-dei servistik qyzmet pen keńester berdi. Ótken jyly 45 biznes-jospar ázirlenip, onyń 16-y jalpy somasy 72 mln teńgeni qurady.
Qalalyq filialdyń qoldaýymen 2017 jyly «Biznestiń jol kartasy – 2020» baǵdarlamasy aiasynda 28 mln teńgege 2 joba qarjylandyryldy jáne 3 joba quny 4,5 mln teńge bolatyn memlekettik grantqa ie boldy. «Biznes-keńesshi» jobasy boiynsha 36 qapshaǵailyq biznes oqytýdan ótti. Al «Iskerlik bailanystar» jobasy arqyly 3 kásipker shetelde óz biliktiligin arttyryp keldi.
Eske salsaq, Almaty oblysyndaǵy tuńǵysh tolyq formatty Kásipkerlerge qyzmet kórsetý ortalyǵy jyl basynda Taldyqorǵanda iske qosylǵan bolatyn. Taldyqorǵandaǵy Kásipkerlerge qyzmet kórsetý ortalyǵynda servistik qyzmetter jáne jaryq, sý, gaz jáne jylýǵa qosylý boiynsha tehnikalyq sharttardy rásimdeý boiynsha qyzmetter kórsetiledi.
