Májilis depýtaty Baqytjan Bazarbek Qapshaǵai qalasy men Ile ózeniniń boiynda 81 jer ýchaskesi zańsyz berilgenin málimdep, Bas prokýratýraǵa depýtattyq saýal joldady, dep habarlaidy Dalanews.kz.
Depýtat Bas prokýratýradan isti jeke baqylaýǵa alýdy jáne jer zańnamasyn óreskel buzǵan laýazymdy tulǵalardy jaýapqa tartýdy talap etti.
“2025 jyldyń maýsym aiynyń sońynda Bas prokýratýraǵa, AShM Jer resýrstaryn basqarý komitetine jáne Sý resýrstary men irrigatsiia ministrligine Qapshaǵai qalasy ákimdigi tarapynan sý qoimasy men Ile ózeniniń jaǵalaýyndaǵy 81 jer ýchaskesin zańsyz berý faktisin tekserý týraly ótinish joldadym. Qoldanystaǵy tyiymdar men shekteýlerge qaramastan, bul ýchaskeler zańsyz berilgen”, – dedi ol.
Bazarbektiń aitýynsha, shilde–tamyz ailarynda júrgizilgen tekseris barysynda 50 ýchaskeden óreskel zańbuzýshylyq anyqtalǵan.
“Zańbuzýshylyqtyń ózi emes, ony kim jasaǵany shoshytady. Qapshaǵai qalasy ákimdiginiń sheneýnikteri Jer kodeksi men Sý kodeksiniń talaptaryn buzyp, jerdi óz qamqorlaryna – Tuńǵysh prezidenttiń jaqyn týystaryna, burynǵy joǵary laýazymdy sheneýnikter men Forbes tizimindegi oligarhtarǵa bólip bergen”, – dedi depýtat.
Onyń sózinshe, zańbuzýshylyq anyqtalǵan ýchaske ielerine 2025 jylǵy 29 tamyzda №445 nusqama berilgen. Alaida tekseris júrgizip jatqan JRBK (DÝZR) men BABI inspektorlary biznes-elita men joǵary laýazymdy sheneýnikter tarapynan qatty qysym kórýde.
Sondai-aq ol Almaty oblysynyń Ile aýdanynda aýyl sharýashylyǵy jerleriniń zańsyz berilgenine qatysty óz qolyna tigen materialdar jaily aitty.
“Jergilikti turǵyndar birneshe ret shaǵymdandy: Ile aýdanyn 14 jyl basqarǵan Nikolai Logýtov qyzmettik ókilettigin paidalanyp, jerdi týystaryna úlestirip kelgen. Búginde sol jerdiń basym bóligi onyń uly Konstantin Logýtovtyń ieliginde”, – dedi ol.
Depýtattyń málimetinshe, Konstantin Logýtovtyń atyna tirkelgen "Montajnik" sharýa qojalyǵy, "DALA INVEST GROUP" JShS, "BILLBOARDS EMPIRE" JShS jáne "AL-AGRO GROUP" JShS bar. Osy kompaniialar arqyly oǵan 10 myń gektardan astam jer tiesili bolýy múmkin.
“Bul aýmaq kólemi jaǵynan Qonaev qalasymen teń, tipti odan da úlken. Al qarapaiym halyq jyldar boiy 10 sotyq jer ala almai júr. Onyń ústine, turǵyndardy mal jaiýǵa nemese sharýashylyq júrgizýge bul jerlerge kirgizbeidi. Ýchaskeler qaraýsyz bos jatyr da, astronomiialyq baǵaǵa satylady”, – dedi Bazarbek.
Sondai-aq ol atalǵan jerlerdiń bir bóligi “qyzyl syzyqta” ornalasqanyn jáne erekshe qorǵalatyn tabiǵi aýmaqtarǵa jatatynyn atap ótti.
“Prezident 2024 jylǵy Joldaýynda: eger jer zańsyz berilse nemese paidalanylmasa, ol qarapaiym tártippen memleketke qaitarylýy tiis ekenin naqty aitty. Biraq ókinishke qarai, maǵan jetken aqparatqa sáikes, Almaty oblysynyń prokýratýrasyndaǵy keibir qyzmetkerler Logýtovtyń áreketterin búrkemelep otyr. Olardyń esimderi meniń depýtattyq saýalymda kórsetiletin bolady”, – dedi depýtat.
Sóz sońynda ol Bas prokýratýrany isti erekshe baqylaýǵa alýǵa, inspektorlardy qysymnan qorǵaýǵa jáne Ile aýdanyndaǵy jerdiń zańsyz berilýine qatysty tergeý júrgizýge shaqyrdy.
